ദോഹ:  പുതിയ സ്‌പോണ്‍സര്‍ഷിപ്പ് നിയമത്തെക്കുറിച്ച് ഖത്തറില്‍ രണ്ട് മാസം നീണ്ടുനില്‍ക്കുന്ന ബോധവല്‍ക്കരണ കാംപയിന്‍ ഈയാഴ്ച മുതല്‍ ആരംഭിക്കും. ആഭ്യന്തര മന്ത്രാലയവും  സാമൂഹികകാര്യ മന്ത്രാലയവും സംയുക്തമായാണ്  കാംപയിന്‍ നടത്തുന്നത്.
പുതിയ നിയമ വകുപ്പുകള്‍, പുതിയ തൊഴില്‍ കരാര്‍ സംവിധാനം തുടങ്ങിയവയെക്കുറിച്ച് പ്രവാസികള്‍ക്കും തൊഴിലുടമകള്‍ക്കുമിടയില്‍ ബോധവല്‍ക്കരണം നടത്തുകയാണ് കാംപയിനിലൂടെ ലക്ഷ്യമാക്കുന്നത്.
രാജ്യത്തെ തൊഴില്‍ സംവിധാന പരിഷ്‌കരണത്തിന്റെ യഥാര്‍ഥ ചിത്രം വെളിവാക്കുന്നതാണ് കാംപയിനെന്ന് തൊഴില്‍സാമൂഹിക കാര്യ മന്ത്രി ഡോ. ഈസ ബിന്‍ സഅദ് അല്‍ജഫാലി പറഞ്ഞു. ബന്ധപ്പെട്ട എല്ലാ കക്ഷികളെയും സഹകരിപ്പിച്ചുകൊണ്ടാണ് ഇത്തരമൊരു പരിപാടി സംഘടിപ്പിക്കുന്നതെന്നും അദ്ദേഹം കൂട്ടിച്ചേര്‍ത്തു.
വേതന സംരക്ഷണ നിബന്ധനക്കു പുറമെ തൊഴിലാളികള്‍ക്ക് നല്ല താമസ സൗകര്യം ലഭ്യമാക്കുക, തൊഴില്‍ നിയമലംഘകര്‍ക്ക് ശിക്ഷ ഉറപ്പുവരുത്തുക തുടങ്ങിയ സമഗ്ര പരിഷ്‌കരണമാണ് പുതിയ നിയമത്തിലൂടെ യാഥാര്‍ഥ്യമാകാന്‍ പോകുന്നതെന്നും അദ്ദേഹം അവകാശപ്പെട്ടു.
ഖത്തര്‍ ചേംബര്‍ ഓഫ് കൊമേഴ്‌സ് അംഗങ്ങളെയും രാജ്യത്തെ വിദേശ എംബസികളിലെ തൊഴില്‍ വകുപ്പ് പ്രതിനിധികളെയും കമ്യൂനിറ്റി നേതൃത്വത്തെയും കമ്പനി പ്രതിനിധികളെയും പങ്കെടുപ്പിച്ചുകൊണ്ടുള്ള വിപുലമായ ശില്‍പശാലയും കാംപയിനോടനുബന്ധിച്ച് സംഘടിപ്പിക്കുന്നുണ്ട്.