വടകര: കണ്ണൂരിലെ ബി.ജെ.പി പ്രവര്‍ത്തകന്റെ കൊലപാതകത്തില്‍ പ്രതിഷേധിച്ച് ബി.ജെ.പി ആഹ്വാനം ചെയ്ത ഹര്‍ത്താല്‍ വടകര മേഖലയില്‍ പൂര്‍ണം. അഴിയൂരില്‍ ഹര്‍ത്താല്‍ അനുകൂലികള്‍ കാര്‍ തടഞ്ഞുവച്ച് നടത്തിയ അക്രമത്തില്‍ സ്ത്രീക്കു പരുക്കേറ്റു.
 തലശ്ശേരി കതിരൂര്‍ ഷാഫിനാസ് ഹൗസില്‍ മൈമൂന (50)യ്ക്കാണ് പരുക്കേറ്റത്. ഇവരെ മാഹി ഗവ. ആശുപത്രിയില്‍ പ്രവേശിപ്പിച്ചു. ഇന്നലെ വൈകിട്ടോടെയാണ് സംഭവം.
എയര്‍പോര്‍ട്ടില്‍ പോയിവരികയായിരുന്ന മാരുതി സ്വിഫ്റ്റ് കാര്‍ സംഘം തടഞ്ഞുനിര്‍ത്തി മുന്‍വശത്തെ ചില്ല് അടിച്ചുതകര്‍ക്കുകയായിരുന്നു. തുടര്‍ന്നു നടന്ന കല്ലേറിലാണ് മൈമൂനക്കു പരുക്കേറ്റത്. സംഭവമറിഞ്ഞ് സ്ഥലത്തെത്തിയ ചോമ്പാല പൊലിസിനു നേരെയും അക്രമമുണ്ടായി. ഇതുമായി ബന്ധപ്പെട്ട് അഴിയൂര്‍ താഴെപറമ്പില്‍ വിനീഷിനെ ചോമ്പാല എസ്.ഐ എന്‍ പ്രജീഷ് അറസ്റ്റ്‌ചെയ്തു.