കൊടുങ്ങല്ലൂര്‍: ദക്ഷിണേന്ത്യയിലെ പ്രമുഖ തീര്‍ത്ഥാടന കേന്ദ്രമായ ചെട്ടിക്കാട് വിശുദ്ധ അന്തോണീസിന്റെ ദേവാലയത്തിലെ ചരിത്ര പ്രസിദ്ധമായ ഊട്ട് തിരുന്നാള്‍ ആഘോഷിച്ചു. കോഴിക്കോട് രൂപതാ മെത്രാന്‍ ഡോ. വര്‍ഗീസ് ചക്കാലക്കല്‍ ഊട്ടുസദ്യ ആശിര്‍വദിച്ചു. തുടര്‍ന്ന് ഇടുക്കി കമ്പംമേട്ടില്‍ നിന്നുമെത്തിയ പയ്യമ്പിള്ളി റോയിക്കും കുടുംബത്തിനും ബിഷപ്പ് ആദ്യ ഊട്ടുസദ്യ വിളമ്പി. ഊട്ടു തിരുന്നാളിനോടനുബന്ധിച്ച് നടന്ന ദിവ്യബലിയില്‍ ഡോ. വര്‍ഗീസ് ചക്കാലക്കല്‍ മുഖ്യകാര്‍മ്മികത്വം വഹിച്ചു. തിരുനാളിന്റെ ഭാഗമായി പ്രദക്ഷിണം, പൂമൂടല്‍, രാവിലെ 6.30 മുതല്‍ രാത്രി 10.30 വരെ തുടര്‍ച്ചയായി ദിവ്യബലി തുടങ്ങിയ ചടങ്ങുകള്‍ നടന്നു. തീര്‍ത്ഥാടന കേന്ദ്രം റെക്ടര്‍ ഫാ. ജോഷി മുട്ടിക്കല്‍, സഹ വികാരി ഫാ. ക്ലീറ്റസ് കൊച്ചിക്കാട്ട് എന്നിവര്‍ നേതൃത്വം നല്‍കി. പള്ളിമുറ്റത്ത് ഒരുക്കിയ വിശാലമായ പന്തലില്‍ 12 കൗണ്ടറുകളിലായി പതിനായിര കണക്കിന് പേര്‍ക്ക് ഒരേ സമയം ഊട്ടു സദ്യ വിളമ്പി. ഈ മാസം 17നാണ് എട്ടാമിടം, അന്നേ ദിവസം പ്രഥമ ദിവ്യ കാരുണ്യം സ്വീകരിച്ച കുട്ടികളുടെ കൂട്ടായ്മ നടക്കും.