ഭോപ്പാല്‍: ഇന്ത്യന്‍ സൈന്യം പാകിസ്താനില്‍ നടത്തിയ മിന്നലാക്രമണത്തെ പുകഴ്ത്തി ഇന്ത്യന്‍ പ്രധാനമന്ത്രി. സൈന്യത്തിന്റെ അര്‍പ്പണവും ത്യാഗമനോഭവവും ഒരിക്കലും വര്‍ണിക്കാന്‍ കഴിയില്ലെന്ന് പ്രധാനമന്ത്രി ഭോപ്പാലില്‍ പറഞ്ഞു. 

ഈ നീക്കത്തില്‍ പ്രതിരോധമന്ത്രിയായ മനോഹര്‍ പരീക്കറുടെ പങ്കും പ്രശംസനീയമെന്ന് പ്രധാനമന്ത്രി പറഞ്ഞു. നമ്മുടെ സൈന്യം സംസാരമല്ല, വീര്യമാണ് പ്രകടിപ്പിക്കുന്നത്. അതുപോലെയാണ് മനോഹര്‍ പരീക്കറും. അദ്ദേഹം കുറച്ചുമാത്രമേ സംസാരിക്കൂ. പ്രവൃത്തിയാകട്ടെ ധാരാളവുമെന്ന് മോദി പറഞ്ഞു.

ത്യാഗത്തിനും മുഷ്യത്വത്തിനും നമ്മുടെ സൈന്യം ലോകത്തിന് മാതൃകയെന്ന് പ്രധാനമന്ത്രി പറഞ്ഞു. യെമനില്‍ രക്ഷാദൗത്യത്തില്‍ ഏര്‍പ്പെട്ട സൈന്യം ഇന്ത്യക്കാരെ രക്ഷപ്പെടുത്തുന്നതിന് പുറമേ പാകിസ്താന്‍കാരെയും രക്ഷപ്പെടുത്തി. ഈ പ്രവൃത്തി ഇന്ത്യന്‍ സൈന്യത്തിന്റെ മനുഷ്യത്വത്തിന് ഉദാഹരണമാണ്. ഇത്തരം ഘട്ടങ്ങളില്‍ രണ്ടു ചിന്തകള്‍ ഇന്ത്യന്‍ സൈന്യത്തിന് ഉണ്ടാവാറില്ല. പാകിസ്താന്‍കാരും മനുഷ്യരാണ് എന്ന ചിന്തയെ ഉണ്ടാവാറുള്ളൂ എന്നും മോദി പറഞ്ഞു.

ആര്‍മി, ബി.എസ്.എഫ്, സി.ആര്‍.പി.എഫ്, കോസ്റ്റ് ഗാര്‍ഡ് എന്നിങ്ങനെ എല്ലാവരും രാജ്യത്തിന്റെ സമാധാനത്തിനു വേണ്ടി ജീവന്‍ ത്യജിച്ച് പ്രവര്‍ത്തിക്കുന്നുവെന്നും അദ്ദേഹം പറഞ്ഞു.