തൃശൂര്‍:കേരള സാഹിത്യ അക്കാദമിയുടെ അറുപതാം വാര്‍ഷികാഘോഷങ്ങളുടെ ഔപചാരിക ഉദ്ഘാടനം ഇന്ന് ഉച്ചക്ക് രണ്ടിന് മുഖ്യമന്ത്രി പിണറായി വിജയന്‍ നിര്‍വഹിക്കും. രാജ്യത്തെ പ്രഥമ പ്രാദേശിക അക്കാദമി കൂടിയായ സാഹിത്യ അക്കാദമിയുടെ ആസ്ഥാനം 1958 മുതലാണ് തൃശൂരിലേക്ക് മാറ്റിയത്. ഇതുവരെ അക്കാദമിക്ക് സ്വന്തം സ്ഥലം ഇല്ല. കെട്ടിടം പൊതുമരാമത്ത് വകുപ്പിന്റെ കീഴിലാണ്. പൊതുമരാമത്ത് വകുപ്പിന് പ്രതിമാസം ഒരു രൂപ വാടക നല്‍കിയാണ് അക്കാദമി പ്രവര്‍ത്തിക്കുന്നത്.
സ്വന്തം കെട്ടിടം ഇല്ലാത്തത്തിന്റെ പേരില്‍ കേന്ദ്ര സര്‍ക്കാരിന്റെ പല അനുകൂല്യങ്ങളും ഇന്നും അക്കാദമിക്ക് ലഭിക്കുന്നില്ല. എന്നിട്ടും മാതൃകപരമായണ് പ്രവര്‍ത്തനം മുന്നോട്ട് പോകുന്നത്. വാര്‍ഷിക ആഘോഷങ്ങളില്‍ അക്കാദമി ചെയര്‍മാന്‍ വൈശാഖന്‍ അധ്യക്ഷനാകും. കൃഷി മന്ത്രി വി. എസ്. സുനില്‍കുമാര്‍ മുഖ്യാതിഥിയായിരിക്കും. എന്‍.എസ്. മാധവന്‍ മുഖ്യപ്രഭാഷണം നടത്തും. മേയര്‍ അജിത ജയരാജന്‍, ജില്ലാ കലക്ടര്‍ ഡോ. എ.കൗശിഗന്‍ പങ്കെടുക്കും. ഇതോടെ ഒരു വര്‍ഷം നീണ്ടു നില്‍ക്കുന്ന ആഘോഷ പരിപാടികള്‍ക്ക് തുടക്കമാകും.