കോഴിക്കോട്: കണ്ണടച്ച് തുറക്കും മുന്‍പ് നൂറുകണക്കിനു പകര്‍പ്പുകളുണ്ടാക്കുന്ന പുതിയ കാലത്തെ അച്ചടിയന്ത്രങ്ങളെ പരിചയപ്പെടുത്തി 'കേരള പ്രിന്റക്‌സ് ' അഖിലേന്ത്യാ പ്രദര്‍ശനം. കേരള പ്രിന്റേഴ്‌സ് അസോസിയേഷന്‍ സംസ്ഥാന സമ്മേളനത്തോടനുബന്ധിച്ചാണ് ജൂബിലി ഹാളില്‍ അച്ചടിയന്ത്രങ്ങളുടെയും അനുബന്ധ സാമഗ്രികളുടെയും പ്രദര്‍ശനം ആരംഭിച്ചത്. അച്ചടിമേഖലയില്‍ ഇന്ത്യക്കകത്തും പുറത്തുമുള്ള ഉല്‍പാദക-വിതരണ രംഗത്തെ അന്‍പതോളം കമ്പനികള്‍ സ്റ്റാളുകള്‍ ഒരുക്കിയിട്ടുണ്ട്.
മണിക്കൂറില്‍ 1200 സ്‌ക്വയര്‍ഫീറ്റ് അച്ചടിക്കാന്‍ സാധിക്കുന്ന ഫ്‌ളക്‌സ് പ്രിന്റിങ് മെഷീനാണ് പ്രദര്‍ശനത്തിലെ ഏറ്റവും ആധുനികമായ യന്ത്രം. 16 മുതല്‍ 22 ലക്ഷം വരെയാണ് വില. പത്തു മിനുട്ടില്‍ ആയിരം കോപ്പി അച്ചടിക്കാവുന്ന പ്രിന്റിങ് മെഷീനും ഒരേസമയം ആറു നിറങ്ങളില്‍ ബാഗിലും ടീഷര്‍ട്ടിലും ടൈല്‍സിലുമെല്ലാം ചിത്രങ്ങള്‍ ആലേഖനം ചെയ്യാവുന്ന മാന്വല്‍ പ്രിന്റിങ് മെഷീനും പ്രദര്‍ശനത്തിലുണ്ട്.
പ്രിന്റ്, കോപ്പിയര്‍, സ്‌കാനര്‍ എന്നീ മൂന്നു സംവിധാനങ്ങളടങ്ങിയ മള്‍ട്ടി ഫങ്ഷന്‍ പ്രിന്ററും പരിചയപ്പെടാം. ഡിജിറ്റല്‍ കളര്‍ ലേസര്‍ പ്രിന്റര്‍, ബ്ലാക്ക് ആന്‍ഡ് വൈറ്റ് ഫോട്ടോകോപ്പിയേഴ്‌സ് തുടങ്ങി ആധുനിക യന്ത്രങ്ങള്‍ നിരവധിയുണ്ട്. മാറുന്ന കാലത്തിനനുസരിച്ച് അച്ചടിവ്യവസായം രൂപപ്പെടുത്താനാണ് മൂന്നുദിവസം നീളുന്ന പ്രദര്‍ശനം ഒരുക്കിയതെന്ന് സംഘാടകര്‍ പറഞ്ഞു.