മുംബൈ: വിമാനയാത്രക്കാര്‍ക്ക് കൂടുതല്‍ സൗകര്യങ്ങളൊരുക്കി എയര്‍ ഇന്ത്യ രംഗത്ത്. രാജ്യത്തെ 26 ഡൊമസ്റ്റിക് എയര്‍പോര്‍ട്ടുകളില്‍ സ്വയം ചെക്ക് ഇന്‍ ചെയ്യാനുള്ള സൗകര്യമാണ് ഒരുക്കിയിരിക്കുന്നത്.
മുംബൈ, ചെന്നൈ, ഡല്‍ഹി, ഹൈദരാബാദ് തുടങ്ങിയ വിമാനത്താവളങ്ങളിലുള്‍പ്പെടെ ഏര്‍പ്പെടുത്തുന്ന ഈ സൗകര്യം ഉപയോഗിച്ച് നീണ്ട ക്യൂവില്‍ നില്‍ക്കാതെ നേരിട്ട് ബാഗേജ് കൗണ്ടറിലേക്കെത്താന്‍ സാധിക്കും.

വിമാനത്താവളങ്ങളില്‍ യാത്രക്കാര്‍ക്ക് ഇതുവഴി സമയം ലാഭിക്കാന്‍ കഴിയുമെന്നും കോമണ്‍ യൂസ് സെല്‍ഫ് സര്‍വീസ് എന്ന പേരില്‍ മെയ് ഒന്നു മുതല്‍ ഇത് ചില സ്ഥലങ്ങളില്‍ പ്രവര്‍ത്തനം ആരംഭിച്ചതായും എയര്‍ ഇന്ത്യ അറിയിച്ചു. രാജ്യത്ത് ഈ സംവിധാനം നടപ്പില്‍ വരുത്തുന്ന ആദ്യ വിമാനക്കമ്പനിയാണ് എയര്‍ ഇന്ത്യ. കേരളത്തില്‍ നെടുമ്പാശേരി, കരിപ്പൂര്‍, തിരുവനന്തപുരം വിമാനത്താവളങ്ങളിലും ഔറംഗാബാദ്, ബംഗളൂരു, ഗോവ, ഭോപ്പാല്‍, ഭുവനേശ്വര്‍, കോയമ്പത്തൂര്‍, ഇന്‍ഡോര്‍, ജെയ്പൂര്‍, ജാംനഗര്‍, ജോധ്പൂര്‍, കൊല്‍ക്കത്ത, ലക്‌നൗ, നാഗ്പൂര്‍, മംഗലാപുരം, റായ്പൂര്‍, രാജ്‌കോട്ട്, ഉദയ്പൂര്‍, വിശാഖപട്ടണം, വാരണാസി എന്നീ വിമാനത്താവളങ്ങളിലും ഈ സൗകര്യമേര്‍പ്പെടുത്തിയിട്ടുണ്ട്.്‌