ബാഗ്ദാദ്: ഇറാഖ് തലസ്ഥാനമായ ബാഗ്ദാദില്‍ ഭീകരര്‍ നടത്തിയ വ്യത്യസ്ത ആക്രമണങ്ങളില്‍ 55 പേര്‍ കൊല്ലപ്പെട്ടു. 63 പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്. ഇവരില്‍ പലരുടേയും നില ഗുരുതരമാണ്. ഏറ്റവു ംകൂടുതല്‍ മരണം റിപ്പോര്‍ട്ട് ചെയ്യപ്പെട്ടത് ബാഗ്ദാദില്‍ ശിഈകളുടെ ആരാധനാ ചടങ്ങിനു നേരെയുണ്ടായ ചാവേറാക്രമണമായിരുന്നു.  ഇതില്‍ 44 പേരാണ് കൊല്ലപ്പെട്ടത്.
ആരാധന ചടങ്ങുമായി ബന്ധപ്പെട്ട് ഒത്തുകൂടിയവര്‍ക്കിടയിലേക്ക്  എത്തിയ ചാവേര്‍ പൊട്ടിത്തെറിക്കുകയായിരുന്നുവെന്ന് പൊലിസ് അറിയിച്ചു.
ഇന്നലെ ഉച്ചയോടെയായിരുന്നു രാജ്യത്തെ നടുക്കിയ ആക്രമണം നടന്നത്. സംഭവത്തില്‍ മരണ സംഖ്യ കൂടാനാണ് സാധ്യതയെങ്കിലും ഇതുസംബന്ധിച്ചുള്ള കൂടുതല്‍ വിവരങ്ങള്‍ പൊലിസ് പുറത്തു വിട്ടിട്ടില്ല.
മറ്റ് രണ്ടു സ്ഥലങ്ങളിലുണ്ടായ ആക്രമണത്തില്‍ എട്ടു പൊലിസുകാര്‍ ഉള്‍പ്പടെ 11 പേരാണ് മരിച്ചത്. തിക് രിതില്‍ പൊലിസ് ചെക്‌പോസ്റ്റിടുത്തുണ്ടായ ചാവേറാക്രമണത്തില്‍ എട്ടു പൊലിസുകാരാണ് മരിച്ചത്. ഇറാഖില്‍ ഐ.എസിനെതിരായി പോരാടുന്ന ഒരു സൈനികന്റെ കുടുംബത്തിനുനേരെയുണ്ടായ ആക്രമണത്തില്‍ അദ്ദേഹത്തിന്റെ ഭാര്യയും മകനും അടക്കം മൂന്നു പേരാണ് മരിച്ചത്. ഈ രണ്ട് ആക്രമണങ്ങളിലും 30 പേര്‍ക്കാണ് പരുക്കേറ്റത്.  ആക്രമണങ്ങളുടെ ഉത്തരവാദിത്തം ഐ.എസ് ഏറ്റെടുത്തിട്ടുണ്ട്.