കൊണ്ടോട്ടി: മൂന്നിയൂര്‍ ഹയര്‍സെക്കന്‍ഡറി സ്‌കൂള്‍ പ്രധാന അധ്യാപകനെ ബൈക്കിലെത്തിയ ആറംഗ സംഘം അക്രമിച്ചതായി പരാതി. ഞായറാഴ്ച രാവിലെ 7.30ഓടെ പെരിയമ്പലത്തു വെച്ചുണ്ടായ ആക്രമണത്തില്‍ മൂന്നിയൂര്‍ ഹയര്‍സെക്കന്‍ഡറി സ്‌കൂള്‍ പ്രധാന അധ്യാപകനായ എന്‍.രാജീവനാണു പരുക്കേറ്റത്.
വീടിന് സമീപത്തെ സൊസൈറ്റിയിലേക്ക് പാല്‍ വാങ്ങാന്‍ പോകുന്നതിനിടെയാണ് ആക്രമണം. ഇരുമ്പുവടി കൊണ്ട് കാലിന് മര്‍ദിക്കുകയായിരുന്നു. മര്‍ദനമേറ്റ രാജീവന്റെ നിലവിളി കേട്ട് ഓടിയെത്തിയ സമീപവാസികളെ കണ്ട് അക്രമികള്‍ രക്ഷപ്പെട്ടു. പൊലിസില്‍ പരാതി നല്‍കി.