മേപ്പാടി: അരപ്പറ്റയിലെ തേയില തോട്ടത്തില്‍ യുവതിയെ കടന്ന് പിടിക്കുകയും പീഡിപ്പിക്കാന്‍ ശ്രമിക്കുകയും ചെയ്ത സംഭവത്തില്‍ പ്രതി അറസ്റ്റിലായി. തിനപുരം നല്ലനൂര്‍ പറമ്പില്‍ തൊടി ബിനു (29) ആണ് അറസ്റ്റിലായത്. കഴിഞ്ഞ അഞ്ചാം തിയതി വൈകിട്ട് ആറോടെയായിരുന്നു സംഭവം. ജോലി കഴിഞ്ഞ് വീട്ടിലേക്ക് നടന്നു പോകുകയായിരുന്ന യുവതിയെ തേയില തോട്ടത്തില്‍ വച്ച് കടന്ന് പിടിച്ച് വാപൊത്തി നിലത്തേക്ക് തള്ളിയിട്ടു. ബഹളം കേട്ട നാട്ടുകാര്‍ ഓടിക്കൂടിയതോടെ പ്രതി ഓടി രക്ഷപ്പെടുകയായിരുന്നു. സംഭവ സ്ഥലത്ത് നിന്നും പ്രതിയുടെ മൊബൈല്‍ ഫോണ്‍ ലഭിച്ചതാണ് പ്രതി പിടിയിലാവാന്‍ കാരണം. സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തിലാണ് ബിനു അറസ്റ്റിലായത്. മേപ്പാടി അഡിഷണല്‍ എസ്.ഐ പ്രകാശന്റെ നേതൃത്വത്തിലായിരുന്നു പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കി റിമാന്റ് ചെയ്തു.