ബഗ്ദാദ്: ഐ.എസ് നിയന്ത്രണത്തിലുള്ള ഇറാഖിലെ മൗസിലില്‍ ഇറാഖ് അനൂകൂല  സേനയുടെ മുന്നേറ്റം. ഇറാഖിലെ പ്രമുഖ നഗരമാണ് മൗസില്‍. 2014 ജൂണ്‍ മുതല്‍ ഐ.എസ് നിയന്ത്രണത്തിലാണ് ഈ പ്രദേശം. തിങ്കളാഴ്ച പുലര്‍ച്ചെയാണ് ഇറാഖ് സൈന്യവും കുര്‍ദ് സൈന്യവും നഗരത്തിലേക്ക് പ്രവേശിച്ചത്. എന്നാല്‍ കനത്ത ഏറ്റുമുട്ടല്‍ നടക്കുകയാണെന്നും ഐ.എസിനെ തുരത്താന്‍ കഴിഞ്ഞിട്ടില്ലെന്നുമാണ് റിപ്പോര്‍ട്ട്.
കഴിഞ്ഞ ഒരുമാസമായി മൗസിലില്‍ ഏറ്റുമുട്ടല്‍ ശക്തമാണ്. പൊതുജനങ്ങളുടെ സുരക്ഷയില്‍ യു.എന്‍ ആശങ്കയും രേഖപ്പെടുത്തിയിരുന്നു. ഐ.എസ് കേന്ദ്രത്തിനു 300 മീറ്റര്‍ അടുത്തുവരെ കുര്‍ദ് ടാങ്കുകള്‍ എത്തിയതായി ബി.ബി.സി റിപ്പോര്‍ട്ട് ചെയ്തു. മൗസിലിനു സമീപത്തെ നിരവധി ഗ്രാമങ്ങള്‍ കുര്‍ദ് സൈന്യം പിടിച്ചെടുത്തു. എന്നാല്‍ കുര്‍ദ് സൈന്യത്തിനു നേരെ എട്ട് ചാവേര്‍ ആക്രമണങ്ങള്‍ നടത്തിയതായി ഐ.എസ് അനുകൂല വാര്‍ത്താ ഏജന്‍സി പറഞ്ഞു.
ഖയ്യാറ വ്യോമതാവളത്തില്‍ നിന്നാണ് ഇറാഖ് അനുകൂല സൈന്യം വ്യോമാക്രമണം നടത്തുന്നത്. ഐ.എസ് നിയന്ത്രണത്തിലായിരുന്ന ഈ താവളം കഴിഞ്ഞ ഓഗസ്റ്റിലാണ് തിരിച്ചുപിടിച്ചത്.
യു.എസ് സൈന്യവും വ്യോമാക്രമണം നടത്തുന്നുണ്ട്. 6.5 ലക്ഷം പേരാണ് നഗരത്തില്‍ കഴിയുന്നത്. കുര്‍ദ് അനുകൂല സൈന്യത്തില്‍ 30,000 അംഗങ്ങള്‍ പ്രവര്‍ത്തിക്കുന്നുണ്ട്. കിഴക്കന്‍ മൗസിലിനു സമീപത്തെ ഗ്രാമങ്ങളില്‍ 4000 കുര്‍ദ് സൈനികര്‍ നിലയുറപ്പിച്ചിട്ടുണ്ട്. 4000 മുതല്‍ 8000 ഐ.എസ് ഭീകരര്‍ നഗരത്തിലുണ്ടെന്നാണ് അനുമാനം.