കല്‍പ്പറ്റ: ജില്ലയെ സംസ്ഥാനത്തെ പ്രഥമ വരള്‍ച്ചാ ബാധിത ജില്ലയായി പ്രഖ്യാപിക്കണമെന്ന് ആവശ്യപ്പെട്ട് മുഖ്യമന്ത്രി, ധനകാര്യ മന്ത്രി, കൃഷിമന്ത്രി എന്നിവര്‍ക്ക് നിവേദനം നല്‍കുമെന്ന് നാഷണലിസ്റ്റ് കിസാന്‍ സഭ ജില്ലാ കമ്മിറ്റി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. വരള്‍ച്ചാ ബാധിത ജില്ലകളെ പ്രഖ്യാപിക്കാനുള്ള സര്‍ക്കാര്‍ തീരുമാനത്തില്‍ ആദ്യ ലിസ്റ്റില്‍ നിന്ന് ജില്ലയെ ഒഴിവാക്കിയത് തിരിച്ചടിയായി.
സംസഥാനത്ത് ഈ വര്‍ഷം ഏറ്റവും കുറവ് മഴ ലഭിച്ചത് ജില്ലയിലാണ്. ജില്ലയിലെ ജനസംഖ്യയില്‍ 90 ശതമാനം പേരും കാര്‍ഷിക മേഖലയെ ആശ്രയിച്ചാണ് ഉപജീവനം നടത്തുന്നത്. കൊടുംവരള്‍ച്ച കാരണം നെല്ല്, ഇഞ്ചി, കാപ്പി, അടക്ക തുടങ്ങിയ കൃഷികള്‍ കരിഞ്ഞുണങ്ങി ഇല്ലാതാവുകയാണ്. കുരുമുളകിന് മഞ്ഞളിപ്പ് രോഗം ബാധിച്ച് കുരുമുളക് കൃഷി തന്നെ അപ്രത്യക്ഷമാകുന്നു.
കാര്‍ഷിക വില തകര്‍ച്ചയും ഉല്‍പാദന കുറവും ഉല്‍പന്ന നാശവും കാര്‍ഷിക ജനതയെ നിരാശരാക്കുന്നു. വരള്‍ച്ചയെ നേരിടാന്‍ സര്‍ക്കാരിന്റെ ഭാഗത്തുനിന്നും യുദ്ധകാലാടിസ്ഥാനത്തില്‍ നടപടികള്‍ ഉണ്ടാവണം. കിണര്‍, കുളം നിര്‍മാണം, തടയണകള്‍ കെട്ടി വെള്ളം സംരക്ഷിക്കല്‍ തുടങ്ങിയ പ്രവര്‍ത്തനങ്ങള്‍ക്ക് ഇപ്പോള്‍ തന്നെ മുന്നിട്ടിറങ്ങണം.
 അനധികൃത ക്വാറികള്‍, റിസോര്‍ട്ടുകള്‍, കെട്ടിട നിര്‍മാണം, മരംമുറി, ലൈസന്‍സില്ലാത്ത ഇഷ്ടിക കളങ്ങള്‍ എന്നിവ ജില്ലയുടെ ജൈവ സമ്പത്തിന് ഭീഷണിയാവുകയാണ്.
 ജില്ലയിലെ ഭൂഗര്‍ഭ ജലനിരപ്പും ക്രമാതീതമായി താഴ്ന്നുകൊണ്ടിരിക്കുന്നു.
യാതൊരു മാനദണ്ഡവുമില്ലാതെയാണ് കുഴല്‍കിണര്‍ നിര്‍മാണത്തിന് അധികൃതര്‍ അനുമതി നല്‍കുന്നത്.
കര്‍ഷകരുടെ കടങ്ങള്‍ക്കും വിദ്യാഭ്യാസ വായ്പകള്‍ക്കും മൊറട്ടോറിയം പ്രഖ്യാപിക്കുക, ജപ്തി നടപടികള്‍ നിര്‍ത്തിവെക്കുക, വര്‍ധിപ്പിച്ച എ.പി.എല്‍ റേഷന്‍ അരിയുടെ വില കുറക്കുക, വായ്പകള്‍ തിരിച്ചടക്കാന്‍ തവണ വ്യവസ്ഥകളുണ്ടാക്കുക തുടങ്ങിയ ആവശ്യങ്ങളും ഭാരവാഹികള്‍ ഉന്നയിച്ചു.
 വാര്‍ത്താസമ്മേളനത്തില്‍ ജില്ലാ പ്രസിഡന്റ് ജോണി കൈതമറ്റം, എന്‍.സി.പി സംസ്ഥാന കമ്മിറ്റി അംഗം സി.എം ശിവരാമന്‍, പി.പി സദാനന്ദന്‍, സ്‌കറിയ മണിക്കുറ്റി, വന്ദന ഷാജി എന്നിവര്‍ പങ്കെടുത്തു.