നിലമ്പൂര്‍: ജില്ലയില്‍ കീടനാശിനി വില്‍പനക്ക് കര്‍ശന നിയന്ത്രണങ്ങളേര്‍പ്പെടുത്തുന്നു. ഇതിന്റെ ഭാഗമായി കേന്ദ്രസര്‍ക്കാരിന്റെ വിജ്ഞാപന പ്രകാരമുള്ള നടപടികള്‍ ആരംഭിക്കുന്നതിന് ജില്ലയിലെ കൃഷി ഭവനുകള്‍ക്ക് നിര്‍ദ്ദേശം നല്‍കി. ഇതു പ്രകാരം പുതിയ കീടനാശിനി കട ആരംഭിക്കുന്നതിനു ശാസ്ത്രവിഷയങ്ങളില്‍ ബിരുദമുള്ളവരെ കടയില്‍ നിയമിക്കേണ്ടതായി വരും.
നിലവിലെ കടകള്‍ അടുത്ത വര്‍ഷത്തോടെ ഇത്തരം നിയമനം നടത്താമെന്ന സമ്മതപത്രവും നല്‍കേണ്ടി വരും. അനധികൃതവും നിരോധിക്കപ്പെട്ടതുമായ കീട നാശിനികള്‍ വ്യാപകമായി ഉപയോഗിക്കുന്നതു തടയുന്നതിനാണ് നിയമം കര്‍ശനമാക്കുന്നത്.
നേരത്തെ കൃഷിപ്രദേശം മാസത്തിലൊരിക്കല്‍ പരിശോധിച്ച് അതത് ജില്ലാ കൃഷി ഓഫിസുകളില്‍ റിപ്പോര്‍ട്ട് നല്‍കാന്‍ കൃഷി ഓഫിസര്‍മാര്‍ക്ക് നിര്‍ദേശം നല്‍കിയിരുന്നുവെങ്കിലും നടപ്പായില്ല. നേരത്തെ ചുവപ്പ്, മഞ്ഞ ലേബലോടുകൂടിയുള്ളതും മനുഷ്യജീവന് ഹാനികരമായതുമായ 14 ഇനം കീടനാശിനികള്‍, കുമിള്‍ നാശിനികള്‍, കളനാശിനികള്‍ എന്നിവയുടെ വില്‍പനയും വിതരണവും ഉപയോഗവും നിരോധിച്ച് സര്‍ക്കാര്‍ ഉത്തരവിറക്കിയിരുന്നു. കീടനാശിനി പ്രയോഗം അനിയന്ത്രിതമായതിനെ തുടര്‍ന്ന് കൃഷി ഓഫിസറുടെ കുറിപ്പില്ലാതെ കീടനാശിനികള്‍ നല്‍കരുതെന്ന് കൃഷി ഡയറക്ടര്‍ ഉത്തരവിട്ടിരുന്നു. 2011 മാര്‍ച്ച് അവസാനമായിരുന്നു ഇത്.
എന്നാല്‍, റബര്‍ തോട്ടങ്ങളില്‍ റൗണ്ട് അപ്പ് വ്യാപകമായി ഉപയോഗിക്കുകയാണിപ്പോഴും. നെല്‍കൃഷിയിലും പച്ചക്കറി തോട്ടങ്ങളിലും തളിക്കുന്ന ക്രോട്ടോ ഫോസും വ്യാപകമാണ്.
പച്ചക്കറി തോട്ടങ്ങളില്‍ ഉപയോഗിക്കുന്ന ലിന്റയിന്‍, വാഴത്തോട്ടങ്ങളില്‍ ഉപയോഗിക്കുന്ന ഫുരുഡാന്‍, കാര്‍ബോറിന്‍ തുടങ്ങിയവയും ഹാനികരമാണ്. മാമ്പൂ കൊഴിയാതിരിക്കാനും പ്രാണികളെ അകറ്റാനും സെവിന്‍, സിംഫൂസ് എന്നീ മാരക കീടനാശിനികളാണ് തളിക്കുന്നത്.
ജില്ലയിലേക്ക് നിരോധിച്ച കീടനാശിനികള്‍ അന്യസംസ്ഥാനങ്ങളില്‍ നിന്നും അതിര്‍ത്തി കടന്നു വരുന്നത് നിര്‍ബാധം തുടരുകയാണ്.
നിയമം നടപ്പിലാകുന്നതോടെ കൃഷിയിടങ്ങളില്‍ മാരകമായ കീടനാശിനികളുടെ ഉപയോഗം നിയന്ത്രിക്കാനാവും. നിലവില്‍ നിരോധിക്കപ്പെട്ട ഇത്തരം രാസ കീടനാശിനികള്‍ പച്ചക്കറി, പഴം കൃഷികളില്‍ ഉപയോഗിക്കുന്നത് ആരോഗ്യപ്രശ്‌നങ്ങള്‍ക്ക് കാരണമാകുന്നുണ്ട്.