കൂത്തുപറമ്പ്: ബൈക്കില്‍ കടത്തുകയായിരുന്ന 36 കുപ്പി മാഹി മദ്യവുമായി യുവാവിനെ എക്‌സൈസ് സംഘം അറസ്റ്റു ചെയ്തു. ചെണ്ടയാട് കുന്നുമ്മല്‍ ഭാഗത്തെ ടി.പി അനിലി (36)നെയാണ് കൂത്തുപറമ്പ് എക്‌സൈസ് ഇന്‍സ്‌പെക്ടര്‍ സിനു കോയില്യത്തും സംഘവും അറസ്റ്റു ചെയ്തത്. കഴിഞ്ഞ ദിവസം രാത്രി 9.30ന് ചെണ്ടയാട് കണ്ടോത്തും ചാലില്‍ വാഹന പരിശോധനയ്ക്കിടെയാണ് ഇയാള്‍ പിടിയിലായത്. ബൈക്കിന്റെ പിന്‍ഭാഗം സീറ്റില്‍ ചാക്കില്‍ കെട്ടിയ നിലയിലായിരുന്നു 14 ലിറ്റര്‍ മദ്യം കണ്ടെത്തിയത്. മദ്യം കടത്താനുപയോഗിച്ച ബൈക്കും കസ്റ്റഡിയിലെടുത്തു. അസി. എക്‌സൈസ് ഇന്‍സ്‌പെക്ടര്‍ മുഹമ്മദ് ഹനീഫ, പ്രിവന്റീവ് ഓഫിസര്‍ പി.സി ഷാജി, സജിത്ത്, ജലീഷ്, അനീഷ് കുമാര്‍ സംഘത്തിലുണ്ടായിരുന്നു.