തലശ്ശേരി: ഇടത്തിലമ്പലം ചിറമ്മലില്‍ കുയ്യാലി പുഴക്കരയ്ക്കടുത്ത് ആര്‍.എസ്.എസ് കേന്ദ്രത്തിനു സമീപത്തെ കുറ്റിക്കാട്ടില്‍ നിന്നും അഞ്ചു സ്റ്റീല്‍ ബോംബുകള്‍ പൊലിസ് കണ്ടെടുത്തു. കടലാസില്‍ പൊതിഞ്ഞ് പ്ലാസ്റ്റിക് സഞ്ചിയില്‍ ഒളിപ്പിച്ച നിലയിലായിരുന്നു ഉഗ്രശേഷിയുള്ള ബോംബുകള്‍. ഇന്നലെ രാവിലെ 10.30ഓടെയാണ് ബോംബ് സ്‌ക്വാഡിന്റെ സഹായത്തോടെ ധര്‍മ്മടം പ്രിന്‍സിപ്പല്‍ എസ്.ഐ നളിനാക്ഷന്‍, അഡീഷണല്‍ എസ്.ഐ നാരായണന്‍, എ.എസ്.ഐ മനോജ് എന്നിവരുടെ നേതൃത്വത്തില്‍ നടത്തിയ പരിശോധനയിലാണ് ബോംബുകള്‍ കണ്ടെത്തിയത്. തലശ്ശേരി ഡിവൈ.എസ്.പി പ്രിന്‍സ് എബ്രഹാം, സി.ഐ പ്രദീപന്‍ കണ്ണിപ്പൊയില്‍ എന്നിവരും സ്ഥലത്തെത്തി. മൂന്നു ദിവസം മുമ്പ് ബ്രണ്ണന്‍ കോളജിനടുത്തെ ഡ്രൈവിങ് ടെസ്റ്റ് ഗ്രൗണ്ട് പരിസരത്തെ ആളൊഴിഞ്ഞ പറമ്പില്‍ നിന്നു ആറ് സ്റ്റീല്‍ ബോംബുകള്‍ പൊലിസ് കണ്ടെടുത്തിരുന്നു