കയ്പമംഗലം: തീരദേശ മേഖലയില്‍ ലഹരി വിരുദ്ധ സ്‌ക്വാഡിന്റെ ഊര്‍ജിതം. അരക്കിലോ കഞ്ചാവുമായി യുവാവ് മതിലകം പൊലിസിന്റെ പിടിയിലായി. പെരിഞ്ഞനം സ്വദേശി മാണിയത്ത് വീട്ടില്‍ അജ്മല്‍(20)ആണ് ജില്ല പൊലിസ് മേധാവി ആര്‍.നിശാന്തിനിയുടെ നേതൃത്വത്തിലുള്ള ലഹരി വിരുദ്ധ സ്‌ക്വാഡിന്റെ പിടിയിലായത്. ഇരിങ്ങാലക്കുട എ.എസ്.പി മെറിന്‍ ജോസഫിന് വിദ്യാര്‍ഥികളില്‍ നിന്ന് കിട്ടിയ രഹസ്യ വിവരത്തിന്റെ അടിസ്ഥാനത്തില്‍ പെരിഞ്ഞനം ആര്‍.എം.വി.എച്ച്.എസ് സ്‌കൂളിന്റെ പരിസരത്ത് നടത്തിയ നിരീക്ഷണത്തിലാണ് അര കിലോ കഞ്ചാവുമായി ഇയാളെ പിടികൂടിയത്. തീരദേശ മേഖലയില്‍ വിദ്യാര്‍ഥികള്‍ക്കും അന്യ സംസ്ഥാന തൊഴിലാളികള്‍ക്കുമാണ് ഇയാള്‍ കഞ്ചാവ് വില്‍പന നടത്തി വന്നിരുന്നതെന്ന് പൊലിസ് പറഞ്ഞു.
ഒരു പൊതിക്ക് 1000 രൂപ നിരക്കിലാണ് ഇയാള്‍ കഞ്ചാവ് വില്‍പന നടത്തി വന്നിരുന്നത്. മതിലകം പൊലിസ് സ്റ്റേഷന്‍ പരിധിയില്‍ ഒരു മാസത്തിനുള്ളില്‍ കഞ്ചാവുമായി 5 പേരാണ് ലഹരി വിരുദ്ധ സ്‌ക്വാഡിന്റെ പിടിയിലാകുന്നത്. കഴിഞ്ഞ ദിവസം കണ്ടശാംകടവ് പടിയം സ്വദേശികളായ അരുണ്‍, റഫീക്ക് എന്നിവരെ കഞ്ചാവുമായി മതിലകം പൊലിസ് അറസ്റ്റ് ചെയ്തിരുന്നു.
കൂടാതെ കയ്പമംഗലം ചളിങ്ങാട് സ്വദേശി അയ്യൂബ്, കാട്ടൂര്‍ സ്വദേശികളായ ആല്‍വിന്‍, റജീബ് എന്നിവരും കഴിഞ്ഞ ഒരു മാസത്തിനുള്ളില്‍ ലഹരി വിരുദ്ധ സ്‌ക്വാഡിന്റെ പിടിയിലായവരാണ്. കൊടുങ്ങല്ലൂര്‍ സി.ഐ പി.സി ബിജുകുമാര്‍, മതിലകം എസ്.ഐ കെ.എസ് സുശാന്ത്, കണ്‍ട്രോള്‍ റൂം എസ്.ഐ വേണു, സീനിയര്‍ സി.പി.ഒമാരായ അഷ്‌റഫ്, ഗോപി, തോമാസ്, സന്തോഷ്, അനൂപ്, പ്രദീപ്, സുദര്‍ശനന്‍, ബിജു, ഉണ്ണികൃഷ്ണന്‍, രാജീവ് എന്നിവരും പ്രതിയെ പിടികൂടിയ സംഘത്തില്‍ ഉണ്ടായിരുന്നു.