ന്യൂഡല്‍ഹി: ലോധ കമ്മിറ്റി ശുപാര്‍ശകള്‍ നടപ്പിലാകാത്ത ബിസിസിഐക്കെതിരെ കടുത്ത നടപടികളുമായി സുപ്രീം കോടതി. ബിസിസിഐയുടെ സാമ്പത്തിക ഇടപാടുകള്‍ക്ക് സുപ്രീം കോടതിയുടെ നിയന്ത്രണം ഏര്‍പ്പെടുത്തി. സംസ്ഥാന ക്രിക്കറ്റ് അസോസിയേഷനുകളുമായുള്ള എല്ലാ പണമിടപാടുകളും സുപ്രിംകോടതി മരവിപ്പിച്ചു.

സംസ്ഥാനങ്ങള്‍ക്ക് ഫണ്ട് കൈമാറുന്നതും സാമ്പത്തിക ക്രയവിക്രയങ്ങളും ലോധ സമിതിയുടെ നിയന്ത്രണത്തിലാകണമെന്നും സുപ്രീം കോടിതി നിര്‍ദേശിച്ചു. അക്കൗണ്ടുകള്‍ സൂഷ്മ പരിശോധനയ്ക്ക് വിധേയമാക്കാന്‍ സ്വതന്ത്ര ഓഡിറ്ററെ നിയമിക്കണമെന്നും കോടതി നിര്‍ദ്ദേശിച്ചു.

ലോധ കമ്മറ്റി ശുപാര്‍ശ ചെയ്ത പരിഷ്‌കാരങ്ങള്‍  നടപ്പിലാക്കുന്നത് സംബന്ധിച്ച സത്യവാ്ങ്മൂലം സമര്‍പ്പിക്കാന്‍ ബി.സി.സി.ഐ പ്രസിഡന്റ് അനുരാഗ് ഠാക്കൂറിനും സെക്രട്ടറി അജയ് ഷിര്‍ഷെയ്ക്കും സുപ്രിംകോടതി നിര്‍ദ്ദേശം നല്‍കിയിട്ടുണ്ട്. നിര്‍ദ്ദേശങ്ങള്‍ എത്രത്തോളം നടപ്പാക്കിയെന്നും പൂര്‍ണമായും നടപ്പാക്കാന്‍ എത്ര സമയം വേണമെന്നും സത്യവാങ്മൂലത്തില്‍ വ്യക്തമാക്കണമെന്നാണ് നിര്‍ദ്ദേശം.