കോഴിക്കോട്: 'കുട്ടികളെ ഈ കൊലക്കത്തി താഴെയിടൂ. ഞങ്ങള്‍ക്കും ഇവിടെ സമാധാനത്തോടെ ജീവിക്കണം...' കണ്ണൂരില്‍ നിന്നുള്ള ഈ യാചന സമാധാനം കൊതിക്കുന്ന സാധാരണ മനുഷ്യരുടേതല്ല, ഒരുകാലത്ത് രാഷ്ട്രീയ വൈരത്തിന്റെ പേരില്‍  ചില രാഷ്ട്രീയപാര്‍ട്ടികള്‍ പറയുന്നതുകേട്ട്  ആയുധമെടുത്ത ഒരുപറ്റം കൊലക്കേസ് പ്രതികളുടേതാണ്. അറസ്റ്റും റെയ്ഡും മുറയ്ക്കു നടക്കുമ്പോഴും കണ്ണൂരില്‍ എന്തുകൊണ്ട് അരുംകൊലകള്‍ക്ക് പൂര്‍ണവിരാമമാകുന്നില്ലെന്നതിന്റെ ഉത്തരം തരികയാണ് പഴയകാലത്തെ കൊലക്കേസ് പ്രതികളായ ചിലര്‍.
 നാളത്തെ 'ഞായര്‍ പ്രഭാത'ത്തിലാണ് നിരവധി കൊലക്കേസുകളില്‍ പ്രതിയായി ജയില്‍ശിക്ഷ അനുഭവിച്ച പ്രതി മനസ് തുറക്കുന്നത്. ഇപ്പോള്‍ രാഷ്ട്രീയത്തില്‍ നിന്നും അകന്ന് സാധാരണ ജീവിതം നയിക്കുന്ന ഈ മനുഷ്യന്‍ ഒരാളെയും കൊലപ്പെടുത്തിയിട്ടില്ലെന്നും വ്യക്തമാക്കുന്നുണ്ട്. എന്നിട്ടും കൊലക്കേസില്‍ പ്രതിയായി. ശിക്ഷിക്കപ്പെട്ടു. കണ്ണൂരില്‍ സംഭവിക്കുന്നതെന്താണെന്നും അതില്ലാതാക്കാന്‍ എന്തുചെയ്യണമെന്നും ഇദ്ദേഹം തുറന്നു പറയുന്നുണ്ട്.
പല കേസുകളിലേയും യഥാര്‍ഥ പ്രതികളല്ല, അറസ്റ്റിലാകുന്നത്. കൊല നടക്കുമ്പോള്‍ വീട്ടില്‍ ഉറങ്ങുന്നവരൊക്കെയാണ് പിന്നീട് അറസ്റ്റിലാകുന്നത്. ഇവരുടെ ബന്ധുക്കള്‍ക്കും രാഷ്ട്രീയ നേതൃത്വത്തിനും പൊലിസിനും ഇത് വ്യക്തമായി അറിയാമെന്നും ഇദ്ദേഹം സമ്മതിക്കുന്നു.