മലപ്പുറം: പുരോഗമന കലാസാഹിത്യസംഘം 11-ാം ജില്ലാ സമ്മേളനം ഇന്നു മുതല്‍ കൊണ്ടോട്ടിയില്‍ നടക്കും. മഹാകവി മോയിന്‍കുട്ടി വൈദ്യര്‍ മാപ്പിളകലാ അക്കാദമിയിലെ ടി.എ.റസാഖ്  നഗറില്‍ നടക്കുന്ന സമ്മേളനം രാവിലെ 10നു കഥാകൃത്ത് സന്തോഷ് ഏച്ചിക്കാനം ഉദ്ഘാടനം ചെയ്യും. സംസ്ഥാന ജനറല്‍ സെക്രട്ടറി പ്രൊഫ.വി.എന്‍.മുരളി, ജില്ലാ സെക്രട്ടറി ബഷീര്‍ ചുങ്കത്തറ, സംസ്ഥാന ട്രഷറര്‍ ടി.ആര്‍.അജയന്‍, പ്രൊഫ.എം.എം.നാരായണന്‍, വി.എം. കുട്ടി എന്നിവര്‍ പങ്കെടുക്കും.
ജില്ലാ പ്രസിഡന്റ് കെ.പി.രമണന്‍ ആധ്യക്ഷനാകും. കവിയരങ്ങിലും ആദരസമ്മേളനത്തിലും മണമ്പൂര്‍ രാജന്‍ബാബു, പാലക്കീഴ് നാരായണന്‍, ഡോ.അനില്‍ ചേലേമ്പ്ര, സി.വാസുദേവന്‍, കാഥികന്‍ തൃക്കുളം കൃഷ്ണന്‍കുട്ടി, ഡോ.എന്‍.രാജന്‍, വിപിന്‍, പ്രൊഫ.എ.എന്‍.ശിവരാമന്‍ നായന്‍ തുടങ്ങിയവര്‍ പങ്കെടുക്കും.
    നാളെ  രണ്ടിനു സാംസ്‌കാരിക സെമിനാര്‍ ഡോ.സെബാസ്റ്റ്യന്‍പോള്‍ ഉദ്ഘാടനം ചെയ്യും. ഡോ.ഖദീജ മുംതാസ് സംസാരിക്കും. ആറിന് ടി.എ.റസാഖ് അനുസ്മരണ സമ്മേളനം ചലച്ചിത്ര സംവിധായകന്‍ കമല്‍ ഉദ്ഘാടനം ചെയ്യും. കവികളും ഗാനരചയിതാക്കളുമായ പി.കെ.ഗോപി, റഫീഖ് അഹമ്മദ് എന്നിവരും യുവസംവിധായകന്‍ ഷാനവാസ് ബാവക്കുട്ടിയും സംസാരിക്കും.