ഫൈനലില്‍ ഇറാനെ 38-29നു കീഴടക്കി
അഹമ്മദാബാദ്: കബഡി ലോകകപ്പില്‍ ഇന്ത്യയുടെ ഹാട്രിക്ക് മുത്തം. ഗംഭീര തിരിച്ചു വരവ് നടത്തി ഇറാനെ കീഴടക്കിയാണ് ഇന്ത്യ തുടര്‍ച്ചയായ മൂന്നാം തവണയും ലോക കിരീടം സ്വന്തമാക്കിയത്. 38-29 എന്ന സ്‌കോറിനാണ് ഇന്ത്യയുടെ വിജയം.
ആദ്യ പകുതിയില്‍ 18-13 എന്ന നിലയില്‍ ഇറാന്‍ മുന്നിലായിരുന്നു. പിന്നീട് ലീഡ് കുറച്ച ഇന്ത്യ സ്‌കോര്‍ 20-19 എന്ന നിലയിലേക്കെത്തിച്ചു. പിന്നീട് 21-20 എന്ന സ്‌കോറില്‍ ലീഡെടുത്ത് മുന്നേറിയ ഇന്ത്യ ഇറാനു ഒരവസരവും നല്‍കാതെ 38-29 എന്ന സ്‌കോറില്‍ വിജയവും ഒപ്പം കിരീടവും സ്വന്തമാക്കുകയായിരുന്നു.
2004, 2007 വര്‍ഷങ്ങളിലാണ് നേരത്തെ ഇന്ത്യ ചാംപ്യന്‍പട്ടം സ്വന്തമാക്കിയത്. മൂന്നുവട്ടവും ഇറാനായിരുന്നു രണ്ടാം സ്ഥാനക്കാര്‍ എന്നതാണ് കൗതുകം. തായ്‌ലന്‍ഡിനെ കീഴടക്കി ദക്ഷിണ കൊറിയ മൂന്നാം സ്ഥാനത്തെത്തി. 2004ല്‍ ലോകകപ്പ് തുടങ്ങിയ ശേഷം ഇന്ത്യ കിരീടം കൈയടക്കിവയ്ക്കുകയാണ്.