തിരുവനന്തപുരം: ഹൈദരാബാദ് ആസ്ഥാനമായുള്ള മലയാളി സംഘടനയായ നവീന സാംസ്‌കാരിക കലാകേന്ദ്രം (എന്‍.എസ്.കെ.കെ) ഏര്‍പ്പെടുത്തിയ ഒ.വി.വിജയന്‍ സാഹിത്യപുരസ്‌കാരം ചന്ദ്രമതിയുടെ 'രത്‌നാകരന്റെ ഭാര്യ' എന്ന ചെറുകഥാ സമാഹാരത്തിനു നല്‍കുമെന്നു അവാര്‍ഡ് ജൂറി ചെയര്‍മാന്‍ പോള്‍ സക്കറിയ വാര്‍ത്താസമ്മേളനത്തില്‍ പറഞ്ഞു.
50,001 രൂപയും കാനായി കുഞ്ഞിരാമന്‍ രൂപകല്‍പന ചെയ്ത ശില്‍പവും കീര്‍ത്തിപത്രവും അടങ്ങുന്നതാണു പുരസ്‌കാരം. നവംബര്‍ ആറിനു ഹൈദരാബാദിലെ എന്‍.എസ്.കെ.കെ സ്‌കൂള്‍ അങ്കണത്തില്‍ നടക്കുന്ന ചടങ്ങില്‍ പുരസ്‌കാരം സമ്മാനിക്കും. ഹിന്ദി കവിയും എഴുത്തുകാരനുമായ അശോക് വാജ്‌പെയി, കേരള സാഹിത്യ അക്കാദമി ചെയര്‍മാന്‍ വൈശാഖന്‍, ആഷാമേനോന്‍ എന്നിവര്‍ പങ്കെടുക്കും. സാഹിത്യ സെമിനാറും ഉണ്ടാവും.
വാര്‍ത്താസമ്മേളനത്തില്‍ എന്‍.എസ്.കെ.കെ വൈസ് ചെയര്‍മാന്‍ എന്‍.എം. തോമസ്, അവാര്‍ഡ് കമ്മറ്റി കണ്‍വീനര്‍ കെ.നന്ദകുമാര്‍, മുഖ്യ ഉപദേശകന്‍ സി.ആര്‍.നീലകണ്ഠന്‍ തുടങ്ങിയവര്‍ പങ്കെടുത്തു.