തൃക്കരിപ്പൂര്‍: ഉപതെരഞ്ഞെടുപ്പ് നടന്ന തൃക്കരിപ്പൂര്‍ പഞ്ചായത്ത് ആയിറ്റി ഒന്നാം വാര്‍ഡില്‍ യു.ഡി.എഫ് സ്ഥാനാര്‍ത്ഥിയായി മത്സരിച്ച മുസ്‌ലിം ലീഗിലെ കെ.വി തഹ്‌സീറ 180 വോട്ടുകളുടെ ഭൂരിപക്ഷത്തിന് ഇടതു സ്വതന്ത്ര സ്ഥാനാര്‍ത്ഥി വി.വി അജിതയെ പരാജയപ്പെടുത്തി. വെള്ളിയാഴ്ച്ച നടന്ന തെരഞ്ഞെടുപ്പില്‍ ഇന്നലെ രാവിലെ പത്ത് മണിക്ക് തൃക്കരിപ്പൂര്‍ ഗ്രാമപഞ്ചായത്ത് ഓഫിസിലായിരുന്നു വോട്ടെണ്ണല്‍. അര മണിക്കൂറിനകം തന്നെ ഫലം പുറത്തുവന്നു.
1527 വോട്ടര്‍മാരില്‍ 1012 പേരാണ് വോട്ടു രേഖപ്പെടുത്തിയത്. ഇതില്‍ യു.ഡി.എഫ് സ്ഥാനര്‍ത്ഥി കെ.വി തഹ്‌സീറക്ക് 552 വോട്ടുകളും, ഇടതു സ്വതന്ത്ര വി.വി അജിതക്ക് 372 വോട്ടുകളും നേടി, ബി.ജെ.പി സ്ഥാനാര്‍ത്ഥി എം ഷൈനിക്ക് 88 വോട്ടുകളും ലഭിച്ചു. മുസ്‌ലിം ലീഗിന്റെ കുത്തക വര്‍ഡാണ് ആയിറ്റി.
കഴിഞ്ഞ തവണ മുസ്‌ലിം ലീഗിലെ ഔദ്യോഗിക സ്ഥാനാര്‍ത്ഥി ഉമ്മുകുല്‍സുവിനെതിരേ ലീഗ് റിബലായി മത്സരിച്ച് 301 വോട്ടിന്റെ ഭൂരിപക്ഷത്തിന് വിജയിച്ച വി അനീസ രാജിവച്ചിരുന്നു. ഈ ഒഴിവിലേക്കാണ് ഉപതെരഞ്ഞെടുപ്പ് നടന്നത്. ലീഗിന്റെ കുത്തക വാര്‍ഡില്‍ ഇടതു സ്വതന്ത്രക്ക് വോട്ടുകൂടിയത് സി.പി എം ക്യാംപില്‍ ആഹ്‌ളാദം ഉയര്‍ന്നിട്ടുണ്ട്. കഴിഞ്ഞ തവണ ബി.ജെ.പിക്ക് 126 വോട്ടുകിട്ടിയ സ്ഥാനത്ത് ഇക്കുറി വെറും 88 വോട്ടുകള്‍ മാത്രമാണ് നേടാനായത്. തഹ്‌സീറയുടെ വിജയത്തോടെ 21 അംഗ പഞ്ചായത്തില്‍ മുസ്‌ലിം ലീഗ് അംഗങ്ങളുടെ എണ്ണം പത്തായി മാറി.