കൊച്ചി: കൊച്ചിയിലോ പരിസരത്തോ തിരക്കേറിയ റോഡില്‍ ഉണ്ടായേക്കാവുന്ന ഇന്ധനച്ചോര്‍ച്ച നേരിടുന്നതിനുള്ള മോക്ക് ഡ്രില്‍ നാളെ ഇരുമ്പനം പുതിയറോഡ് റിഫൈനറി റോഡില്‍ നടത്തും. ജില്ലാ ദുരന്തനിവാരണ അതോറിറ്റിയുടെ നേതൃത്വത്തില്‍ വിവിധ വകുപ്പുകളെ ഏകോപിപ്പിച്ച് വിപുലമായ മോക്ക് ഡ്രില്‍ ആണ് നടത്തുന്നത്.
ഒരു എല്‍.പി.ജി ടാങ്കറും ഡീസല്‍ ടാങ്കറും കൂട്ടിയിടിക്കുമ്പോഴത്തെ സ്ഥിതിയുടെ ചിത്രീകരണമാണ് മോക്ക് ഡ്രില്ലില്‍ ആവിഷ്‌കരിച്ചിരിക്കുന്നത്. മോക്ക് ഡ്രില്ലിന്റെ ഭാഗമായി അപകടം ആസൂത്രണം ചെയ്തിരിക്കുന്ന ഭാഗത്തിന് 200 മീറ്റര്‍ ചുറ്റളവില്‍ ജനങ്ങളെ ഒഴിപ്പിക്കും. രാവിലെ 11 മുതല്‍ ഒരുമണിവരെയാണ് മോക്ക് ഡ്രില്‍.
ഈ സമയത്ത് സീപോര്‍ട്ട് എയര്‍പോര്‍ട്ട് റോഡില്‍ വിളക്കു ജംഗ്ഷനില്‍ നിന്ന് റിഫൈനറി ഭാഗത്തേക്കും അമ്പലമേടില്‍ നിന്ന് റിഫൈനറി ഭാഗത്തേക്കും വാഹന ഗതാഗതം തടയും. ഇതനുസരിച്ച് മുവാറ്റുപുഴ ഭാഗത്തേക്കു പോകേണ്ട വാഹനങ്ങള്‍ കരിങ്ങാച്ചിറ ജംഗ്ഷനില്‍ നിന്ന് തിരുവാങ്കുളം വഴിയും ഇരുമ്പനം ഭാഗത്തേക്കുള്ളവ അമ്പലമേട് പോലീസ് സ്റ്റേഷനു മുന്നിലൂടെ കാക്കനാട് റോഡിലൂടെയും പോകേണ്ടതാണ്.