അരൂര്‍: ദേശീയപാതയില്‍ ഉണ്ടായ വ്യത്യസ്ത വാഹനാപകടങ്ങളില്‍ നിരവധി പേര്‍ക്ക് പരുക്ക്. ഒരു മദ്രസ വിദ്യാര്‍ത്ഥി മരിക്കുകയും 21 പേര്‍ക്ക് പരുക്കേല്‍ക്കുകയും ചെയ്തു.
അരൂര്‍ ശ്രീനാരായണ നഗറിനു സമീപം ഓട്ടോ റിക്ഷയും ബൈക്കും കൂട്ടിയിടിച്ച് മൂന്ന് പേര്‍ക്ക് പരുക്കേറ്റു. ബൈക്ക് യാത്രികരായ ചന്തിരൂര്‍ ദിവാകരന്റെ മകന്‍ അനൂപ്(23), മൂര്‍ത്തിക്കല്‍ ബാബുവിന്റെ മകന്‍ ശരത്ത് (23), ഓട്ടോ ഡ്രൈവറായ ഓതിക്കന്‍ പറമ്പില്‍ പുഷ്പന്‍ (50)എന്നിവര്‍ക്കാണ് പരുക്കേറ്റത്. അനൂപിനെ മരട് ലെക്ക്‌ഷോര്‍ ആശുപത്രിയിലും ബാബുവിനെ കോട്ടയം മെഡിക്കല്‍ കോളേജിലും പ്രവേശിപ്പിച്ചു. ഓട്ടോ ഡ്രൈവര്‍ പുഷ്പനെ അടുത്തുള്ള സ്വകാര്യ ആശുപത്രിയില്‍ പ്രഥമ ശുശ്രൂഷ നല്‍കി വിട്ടയച്ചു. ചന്തിരൂര്‍ ഭാഗത്തുനിന്ന് വന്ന ബൈക്ക് യൂ ടേണില്‍ വളക്കുമ്പോള്‍ വടക്കുനിന്ന് ക്ഷേത്രം കവലയിലേക്ക് വരുകയായിരുന്ന ഓട്ടോയുമായി ഇടിക്കുകയായിരുന്നു.
മറ്റൊരു അപകടത്തില്‍ ചന്തിരൂര്‍ സെന്റ് മേരീസ് പള്ളിക്ക് സമീപം മൂന്ന് കാറും ഒരു ടൂറിസ്റ്റ് ബസ്സും കുട്ടിയിടിച്ച് പതിനഞ്ചോളം വിദ്യാര്‍ത്ഥികള്‍ക്ക് പരുക്ക്.തിരുവനന്തപുരം കാര്‍മല്‍ സ്‌ക്കൂള്‍ വിദ്യാര്‍ത്ഥികളായ മീനാക്ഷി (16), അഖില (17), അനുപമ (17), ഐശര്യാ സന്തോഷ് (17), സ്നേഹാ ശ്രീകുമാര്‍ (17), നന്മന (17), ദേവീക്യഷ്ണ (17),ഐശര്യ (17), ഭാഗ്യ (17), ഫര്‍ഹാന (17), അന്ന (17),നബീസ (17), അബിജിത്ത് (15) എന്നിവര്‍ക്കാണ് പരുക്കേറ്റത്. ഇവരെ അടുത്തുള്ള സ്വകാര്യ ആശുപത്രിയില്‍ എത്തിച്ച് പ്രഥമ ശുശ്രൂഷ നല്‍കി വിട്ടയച്ചു. വെള്ളിയാഴ്ച രാത്രിയിലായിരുന്നു അപകടം. എറണാകുളം വണ്ടര്‍ലാ അമ്യൂസ്‌മെന്റ് പാര്‍ക്കില്‍ വിനോദയാത്രക്ക് പോയി മടങ്ങവേയാണ് അപകടം ഉണ്ടായത്. മൂന്ന് കാറുകള്‍ക്ക് പിന്നിലാണ് ബസ്സ് ഇടിച്ചത്. ദേശീയ പാതയില്‍ ഗതാഗതക്കുരുക്ക് ഉണ്ടായപ്പേള്‍ കാറുകളും നിര്‍ത്തിയിരുന്നു.എന്നാല്‍ പെട്ടെന്ന് ബ്രേക്ക് ചെയ്ത ബസ്സ് മുന്നില്‍ നിര്‍ത്തിയിരുന്ന മേഴ്‌സിഡസ്് കാറില്‍ ഇടിക്കുകയും ഇടിയുടെ ആഘാതത്തില്‍ മറ്റു കാറുകളും പിന്നിലായി ഇടിക്കുകയായിരുന്നു. മെഴ്‌സിഡസ് കാറ് പൂര്‍ണ്ണമായും തകര്‍ന്നു.ബസ്സില്‍ ഡാന്‍സ് ചെയ്തിരുന്ന കുട്ടികള്‍ക്കാണ് പരുക്കേറ്റത്. അരൂര്‍ പോലീസ് സ്ഥലത്തെത്തി ദേശീയപാതയിലുണ്ടായ ഗതാഗതക്കുരുക്ക് മാറ്റി.
ചന്തിരൂര്‍ പുതിയ പാലത്തിനു സമീപം ലോറി തട്ടി ബൈക്ക് യാത്രികരായ രണ്ട് പേര്‍ക്ക് പരുക്കും ഒരു കുട്ടി മരിക്കുകയും ചെയ്തു. മദ്രസ വിദ്യാര്‍ത്ഥിയായ ചന്തിരൂര്‍ കുന്നേല്‍ പറമ്പില്‍ അയൂബ്(8) ആണ് മരിച്ചത്.സഹോദരന്‍ അസ് ലാം (8)ബൈക്ക് ഓടിച്ചിരുന്ന മാതൃസഹോദരന്‍ ചന്തിരൂര്‍ കൂട്ടുങ്കല്‍ ഷാന്‍ മുഹമ്മദ് (32)എന്നിവരെ മരട് ലെയ്ക്ക്‌ഷോര്‍ ആശുപത്രിയില്‍ പ്രവേശിപ്പിച്ചു.അസ്‌ലാം തീവ്ര പരിചരണവിഭാഗത്തിലാണ്.