കൊച്ചി: വീണാ ജോര്‍ജ് എം.എല്‍.എയ്‌ക്കെതിരായ തെരഞ്ഞെടുപ്പു ഹരജി നിലനില്‍ക്കുമെന്ന് വ്യക്തമാക്കിയ ഹൈക്കോടതി കേസ് കൂടുതല്‍ വാദത്തിനായി നവംബര്‍ ആദ്യം പരിഗണിക്കാന്‍ മാറ്റി. ആറന്മുളയില്‍ വീണാ ജോര്‍ജിനെതിരേ മത്സരിച്ച യു.ഡി.എഫ് സ്ഥാനാര്‍ഥി ശിവദാസന്‍ നായരുടെ ഇലക്ഷന്‍ ഏജന്റ് വി.ആര്‍ സോജി നല്‍കിയ ഹരജി, പ്രാരംഭ തടസവാദങ്ങള്‍ തള്ളിയാണ് നില നില്‍ക്കുമെന്ന് സിംഗിള്‍ബെഞ്ച് വ്യക്തമാക്കിയത്.
ചട്ടങ്ങളും നടപടിക്രമങ്ങളും പാലിച്ചാണോ ഹരജി സമര്‍പ്പിച്ചതെന്നതടക്കമുള്ള വിഷയങ്ങളാണ് പ്രാരംഭ വാദത്തില്‍ ഹൈക്കോടതി പരിഗണിച്ചത്. നാമനിര്‍ദേശ പത്രികക്കൊപ്പം സമര്‍പ്പിച്ച സത്യവാങ്മൂലത്തില്‍ സ്വത്തു വിവരങ്ങള്‍ കൃത്യമായി രേഖപ്പെടുത്തിയില്ലെന്നും സാമുദായിക പ്രീണനം നടത്തി വോട്ടര്‍മാരെ സ്വാധീനിച്ചെന്നുമാണ് ഹരജിയില്‍ ആരോപിച്ചിരുന്നത്. ദുബൈയിലെ ഒരു കമ്പനിയുടെ പേരിലുള്ള ഭര്‍ത്താവിന്റെ നോണ്‍ റെസിഡന്റ്‌സ് ഓര്‍ഡിനറി സേവിങ്‌സ് ബാങ്ക് അക്കൗണ്ടിന്റെ വിവരങ്ങള്‍ സത്യവാങ്മൂലത്തില്‍ ഇല്ലെന്നും വീണാ ജോര്‍ജ് പ്രാര്‍ഥിക്കുന്ന ചിത്രം സാമുദായിക പ്രീണനമെന്ന ലക്ഷ്യത്തോടെ പ്രചരിപ്പിച്ചെന്നും ഹരജിയില്‍ ചൂണ്ടിക്കാട്ടിയിരുന്നു. ഫേസ് ബുക്കില്‍ ചിത്രം പോസ്റ്റു ചെയ്തത് തന്റെ സഹപാഠിയാണെന്ന വിശദീകരണം വീണാ ജോര്‍ജ് നല്‍കിയെങ്കിലും ഇതു തൃപ്തികരമല്ലെന്നാണ് ഹരജിക്കാരന്റെ വാദം. അഖില മലങ്കര അല്‍മായ വേദി വീണയ്ക്കു വേണ്ടി ലഘുലേഖകളും ചിത്രങ്ങളും വിതരണം ചെയ്തിരുന്നെന്നും ഇത് ചൂണ്ടിക്കാട്ടി പരാതി നല്‍കിയിട്ടും നടപടിയുണ്ടാകാത്ത സാഹചര്യത്തിലാണ് ഹൈക്കോടതിയെ സമീപിക്കുന്നതെന്നും ഹരജിയില്‍ വ്യക്തമാക്കിയിട്ടുണ്ട്.