പാവറട്ടി: വംശനാശ ഭീഷണി നേരിട്ടുകൊണ്ടിരിക്കുന്ന കടലാമകളെ നശിപ്പിക്കുകയും വെട്ടിപ്പരുക്കേല്‍പിക്കുകയും കടലാമ മുട്ടകള്‍ മോഷ്ടിക്കപ്പെടുകയും ചെയ്യുന്ന പ്രവൃത്തികള്‍ വ്യാപകമായതിനെ തുടര്‍ന്ന് കടലാമ സംരക്ഷണത്തിന് സംസ്ഥാന-ജില്ലാതല കമ്മിറ്റികള്‍ രൂപീകരിക്കാന്‍ സര്‍ക്കാര്‍ ഉത്തരവായി.
ഈ മേഖലയില്‍ പ്രവര്‍ത്തിച്ചു വരുന്ന ന്യൂസ് ഓഫ് ഇന്ത്യയുടെ കീഴിലുള്ള ന്യൂസ് ഫോര്‍ ടര്‍ട്ടില്‍ പ്രൊട്ടക്ഷന്‍ കോര്‍ഡിനേറ്റര്‍ രവി പനയ്ക്കല്‍  മുഖ്യമന്ത്രിക്ക് നല്‍കിയ നിവേദനത്തെ തുടര്‍ന്നാണ് സമിതികള്‍ രൂപീകരിക്കാന്‍ ഫിഷറീസ് ഡയറക്ടര്‍ക്ക് നിര്‍ദേശം നല്‍കി ഉത്തരവിറങ്ങിയത്.
പരുക്കേറ്റ കടലാമകള്‍ തീരങ്ങളിലടിയുന്നതിനെ പരിപാലിച്ച് വീണ്ടും കടലിലേക്കിറക്കി വിടുകയും തീരത്തെത്തി മുട്ടയിടുന്ന കടലാമകളുടെ മുട്ടകള്‍ സംരക്ഷണം നല്‍കി വിരിയിച്ച് ബന്ധപ്പെട്ട ഉദ്യോഗസ്ഥരുടെയും ജനപ്രതിനിധികളുടെയും സാന്നിധ്യത്തില്‍ കടലിലേക്ക് ഒഴുക്കി വിടുകയും കടലാമ മുട്ടകള്‍ മോഷണം പോകുന്നതിന് കാവലാളാവുകയും ചെയ്യുന്ന കടലാമ സംരക്ഷണ സമിതികള്‍ നിലവില്‍ വിവിധയിടങ്ങളില്‍ പ്രവര്‍ത്തിച്ചുവരുന്നുണ്ട്.
ഇത്തരം പ്രവര്‍ത്തനങ്ങളുടെ വിജയത്തിന് വേണ്ടിയും തീരദേശങ്ങളിലുള്ളവരെ ബോധവല്‍കരിക്കുന്നതിനും വേണ്ടിയാണ് സര്‍ക്കാര്‍ തലത്തില്‍ തന്നെ കമ്മിറ്റികള്‍ രൂപീകരിക്കുന്നത്.