കൊച്ചി: ഹൈക്കോടതി ഉത്തരവിന്റെ അടിസ്ഥാനത്തില്‍ കരള്‍മാറ്റ ശസ്ത്രക്രിയക്ക് വിധേയയായ അലിയ ഫാത്തിമയെന്ന ഒരു വയസുകാരി സുഖംപ്രാപിച്ച സാഹചര്യത്തില്‍ തുടര്‍ചികിത്സക്ക് നിര്‍ദേശം നല്‍കി ഹരജിയിലെ തുടര്‍നടപടികള്‍ ഡിവിഷന്‍ ബെഞ്ച് അവസാനിപ്പിച്ചു.
കരള്‍ ദാതാവിനെയും ഡോക്ടര്‍മാരെയും അഭിനന്ദിച്ചാണ് ഹെക്കോടതി തുടര്‍നടപടികള്‍ അവസാനിപ്പിച്ചത്.
ഒന്‍പതു മാസം പ്രായമുള്ള മകള്‍ അലിയ ഫാത്തിമയെ കരള്‍മാറ്റ ശസ്ത്രക്രിയക്ക് ഹാജരാക്കാന്‍ ഭാര്യയും ഭാര്യാപിതാവും വിട്ടുകൊടുക്കുന്നില്ലെന്ന് ആരോപിച്ച് തിരുവനന്തപുരം ചൊവ്വര അമ്പലത്തുംമൂല സ്വദേശി നല്‍കിയ ഹരജി കഴിഞ്ഞ വര്‍ഷമാണ് ഹൈക്കോടതിയുടെ പരിഗണനയ്‌ക്കെത്തിയത്. തുടര്‍ന്ന് കുഞ്ഞിന്റെ ശസ്ത്രക്രിയക്കു വേണ്ടി ഡിവിഷന്‍ ബെഞ്ച് നേരിട്ട് ഇടപെട്ടു. തിരുവനന്തപുരത്തെ കിംസ് ആശുപത്രിയില്‍ കരള്‍മാറ്റ ശസ്ത്രക്രിയ നടത്താനുള്ള ഒരുക്കങ്ങള്‍ക്ക് നിര്‍ദേശം നല്‍കി.
തിരുവനന്തപുരം തിരുമല സ്വദേശിനിയായ പി.വി ശ്രീരഞ്ജിനിയായിരുന്നു ദാതാവ്. കരള്‍ സ്വീകരിക്കുന്നതിനുള്ള നിയമപരമായ നടപടികള്‍ വേഗം പൂര്‍ത്തിയാക്കാന്‍ ഹൈക്കോടതി സമയാസമയങ്ങളില്‍ നിര്‍ദേശം നല്‍കിയിരുന്നു.