റിയാദ്: ഇന്ത്യയിലേക്കു വരികയായിരുന്ന എണ്ണ ടാങ്കറിന് നേരെ യമന്‍ അതിര്‍ത്തിയില്‍ കനത്ത ആക്രമണം നേരിടേണ്ടി വന്നതായി റിപ്പോര്‍ട്ട്.

ആക്രമണം നടന്നെങ്കിലും കപ്പല്‍ സുരക്ഷിതമാണ്.

യമന്‍ തീരപ്രദേശത്തോട് ചേര്‍ന്ന ബാബ് അല്‍ മന്‍ദബ് പ്രദേശത്തുവച്ചാണ് ആക്രമണം നേരിട്ടതെന്ന് യമനിലെ ഹൂതികള്‍ക്കെതിരെ യുദ്ധത്തിലേര്‍പ്പെട്ട അറബ സഖ്യ സേന വക്താവ് മേജര്‍ ജനറല്‍  അഹ്മദ് അസീരി വ്യക്തമാക്കി.

ഉക്രൈനില്‍നിന്ന് ഇന്ത്യയിലേക്ക് പോകുകയായിരുന്ന എണ്ണ ടാങ്കറായ എല്‍ എന്‍ ജി മെലാത്തി സാത്തു കപ്പലിന് നേരെയാണ് ബുധനാഴ്ച്ച ആക്രമണം നടന്നത്.

ഉഗ്ര ശേഷിയുള്ള റോക്കറ്റ് ഉപയോഗിച്ചാണ് ആക്രമണം നടന്നതെന്ന് അസീരി പറഞ്ഞു. കപ്പല്‍ ജീവനക്കാര്‍ അയച്ച അപായ സന്ദേശം മേഖലയില്‍ നങ്കൂരമിട്ട യു എ ഇ കപ്പലിലാണ് ആദ്യം എത്തിയത്. ഇവര്‍  സഊദി തീരദേശ സേനക്ക് സന്ദേശം കൈമാറുകയായിരുന്നു.

ഉടനടി സംഭവസ്ഥലത്തു കുതിച്ചെത്തിയ സഊദി നാവിക സേന കപ്പലിനെ ആക്രമണങ്ങളില്‍ നിന്നും രക്ഷപ്പെടുത്തുകയും ആക്രമണം നടന്ന ബാബ അല്‍ മന്‍ദബ്  മേഖല കഴിയുന്നത് വരെ സുരക്ഷിത അകമ്പടി സേവിക്കുകയും ചെയ്തു.

യമനിലെ സംഘര്‍ഷം ഉടനടി അവസാനിപ്പിക്കണമെന്ന സന്ദേശമാണ് ഇതിലൂടെ വ്യക്തമാകുന്നതെന്നു അസീരി പറഞ്ഞു. പ്രധാന കപ്പല്‍ ചാലായ ഇതിലൂടെ കപ്പലുകള്‍ കടന്നു പോകുന്നതിനു ഇത് അത്യാവശ്യമാണെന്നും അദ്ദേഹം കൂട്ടിച്ചര്‍ത്തു.

നേരത്തെ ഹൂതികള്‍ യു എ ഇ കപ്പലിന് നേരെയും അമേരിക്കന്‍ നാവിക കപ്പലിന് നേരെയും യമന്‍ തീര പ്രദേശത്തു നിന്നും ആക്രമണം നടത്തിയിരുന്നു. എന്നാല്‍ അത്യാഹിതം സംഭവിക്കാതെ ഇരു കപ്പലുകളും രക്ഷപ്പെടുകയായിരുന്നു.