പേരാമ്പ്ര: കുറ്റ്യാടി-ഉള്ള്യേരി സംസ്ഥാനപാതയില്‍ അപകടങ്ങള്‍ നിത്യമാകുന്നു. കഴിഞ്ഞ രണ്ടുദിവസത്തിനിടെ നാലു അപകടങ്ങളാണ് ഇവിടെ നടന്നത്.
കക്കാട് പഴയ പെട്രോള്‍ പമ്പിനടുത്ത് കാറുകള്‍ കൂട്ടിയിടിച്ച് രണ്ടുപേര്‍ മെഡിക്കല്‍ കോളജില്‍ ചികിത്സ തേടിയിരുന്നു. ഈ ഭാഗത്ത് വാഹനങ്ങള്‍ പരസ്പരം കാണാന്‍ കഴിയാത്ത വിധം റോഡിന്റെ വളവും കയറ്റവും അപകടം വിളിച്ചുവരുത്തുന്നുണ്ട്.
 റോഡില്‍ അപായസൂചന നല്‍കുന്ന ദിശാസൂചികകളും ഇവിടെ സ്ഥാപിച്ചിട്ടില്ല. കഴിഞ്ഞ വ്യാഴാഴ്ച മൂരി കുത്തിക്കും ലാസ്റ്റ്  കല്ലോടിനും ഇടയ്ക്കുള്ള വളവിലും കാറും ബൈക്കും കൂട്ടിയിടിച്ച് അപകടമുണ്ടായിരുന്നു.
ഇന്നലെ  പുലര്‍ച്ചെ വടകര റോഡ് ജങ്ഷനില്‍ കാര്‍ കടവരാന്തയില്‍ പാഞ്ഞുകയറിയും അപകടമുണ്ടായി. നവീകരിച്ച സംസ്ഥാനപാതയില്‍ വാഹനങ്ങളുടെ അമിതവേഗതയില്‍ നിരവധി ജീവനുകളും നഷടപ്പെട്ടിരുന്നു.