ജിദ്ദ:പുണ്യസ്ഥലങ്ങളുടെ വികസന പദ്ധതികള്‍ക്കും മക്ക പ്രവിശ്യയിലെ ചേരിപ്രദേശങ്ങളുടെ നവീകരണത്തിനും മുന്‍ഗണന നല്‍കാന്‍ തിരുഗേഹങ്ങളുടെ സേവകന്‍ സല്‍മാന്‍ രാജാവിന്റെ ഉപദേഷ്ടാവും മക്ക ഗവര്‍ണറുമായ ഖാലിദ് അല്‍ഫൈസല്‍ രാജകുമാരന്റെ നിര്‍ദേശം.
മക്ക പുണ്യസ്ഥല വികസന അതോറിറ്റിയുടെ പ്രവര്‍ത്തന പരിധിയില്‍ ജിദ്ദയും തായിഫും അടക്കം മക്ക പ്രവിശ്യ മുഴുവന്‍ ഉള്‍പ്പെടുത്തുന്നതിന് അനുമതി നല്‍കിയ ശേഷം ജിദ്ദയില്‍ മക്ക ഗവര്‍ണറേറ്റ് ആസ്ഥാനത്ത് ചേര്‍ന്ന മക്ക പ്രവിശ്യ വികസന അതോറിറ്റിയുടെ യോഗത്തില്‍ അധ്യക്ഷതവഹിക്കുകയായിരുന്നു അദ്ദേഹം.
അതോറിറ്റിക്ക് കീഴില്‍ രൂപീകരിച്ച സബ് കമ്മിറ്റികള്‍ക്കും ഗവര്‍ണര്‍ അംഗീകാരം നല്‍കി. ലക്ഷ്യങ്ങള്‍ നേടാന്‍ കഴിയുന്നതിനും പ്രവിശ്യയില്‍ വികസനം സാക്ഷാത്ക്കരിക്കുന്നതിനും ഒറ്റക്കെട്ടായി പ്രര്‍ത്തിക്കുന്നതിന് ഗവര്‍ണര്‍ നിര്‍ദേശിച്ചു.
മക്കയിലെ ചില ചേരി പ്രദേശങ്ങളുടെ നവീകരണ പദ്ധതിയുടെ പുരോഗതിയും യോഗം വിലയിരുത്തി.
വിഷന്‍ 2030 പദ്ധതിക്ക് അനുസൃതമായി പ്രവിശ്യയില്‍ വികസന പദ്ധതികള്‍ നടപ്പാക്കുന്നതിന് സ്വകാര്യ മേഖലയുമായുള്ള പങ്കാളിത്തം കൂടുതല്‍ ശക്തിപ്പെടുത്താനും ധാരണയായി.