പാരിപ്പള്ളി: തെരഞ്ഞെടുപ്പ് ജോലിക്ക് പോയ വില്ലേജ് ഓഫിസര്‍ക്ക് കലക്ടറേറ്റിലെ ജീവനക്കാരില്‍ നിന്ന് മര്‍ദ്ദനമേറ്റതായി പരാതി. കല്ലുവാതുക്കല്‍ വില്ലേജ് ഓഫിസിലെ സ്‌പെഷ്യല്‍ വില്ലേജ് ഓഫിസറായ അശ്വനികുമാറിനാണ് മര്‍ദനമേറ്റത്.
തെരഞ്ഞെടുപ്പ് പ്രവര്‍ത്തനങ്ങള്‍ക്കായി ഞായറാഴ്ച കൊല്ലം ഗവ.മോഡല്‍ ഹൈസ്‌കൂളില്‍ റൂട്ട് ഓഫിസറായി എത്തിയ അശ്വനികുമാറിനെ കലക്ടറേറ്റിലെ ജീവനക്കാരായ രണ്ട് പേര്‍ ചേര്‍ന്ന് സ്‌കൂളിന് പിന്നിലേക്ക് കൂട്ടികൊണ്ട് പോയി മര്‍ദിക്കുകയായിരുന്നു. മൂത്രപ്പുര എവിടെയെന്ന് ചോദിച്ചതിനായിരുന്നു മര്‍ദനം.
മുഖത്തും നട്ടെല്ലിനും പരിക്കേറ്റ് അബോധാവസ്ഥയിലായ ഉദ്യോഗസ്ഥനെ സഹപ്രവര്‍ത്തകര്‍ ചേര്‍ന്ന് ജില്ലാ ആശുപത്രിയില്‍ പ്രവേശിപ്പിച്ചു. ഇത് സംബന്ധിച്ച് കൊല്ലം വെസ്റ്റ് പൊലിസ്, തഹസില്‍ദാര്‍, റിട്ടേണിങ് ഓഫിസര്‍, കലക്ടര്‍ എന്നിവര്‍ക്ക് പരാതി നല്കി.