തൊടുപുഴ: എ.ടി.എം കാര്‍ഡ് തട്ടിപ്പില്‍ ഇതരസംസ്ഥാന തൊഴിലാളിയുടെ പരാതി സ്വീകരിച്ചില്ലെന്ന് ആക്ഷേപം. പശ്ചിമ ബംഗാള്‍ സ്വദേശി ഗോവിന്ദ് തമംഗ്(26)ന്റെ 124000 രൂപ നഷ്ടപ്പെട്ടതിനെക്കുറിച്ച് പരാതി പറയാന്‍ ചെന്ന യുവാവിനെ മടക്കി അയച്ചതായാണ് ആക്ഷേപമുയരുന്നത്.കഴിഞ്ഞ ദിവസം ഉച്ചയ്ക്ക് ഗോവിന്ദിന്റെ ഫോണിലേയ്ക്ക് 7480943814 എന്ന നമ്പരില്‍ നിന്നുമാണ് ഫോണ്‍ കോളെത്തിയത്.
എ.ടി.എം കാര്‍ഡിന്റെ പിന്‍ നമ്പര്‍ മാറ്റാനാണെന്നും പറഞ്ഞ് കാര്‍ഡിലെ 16 അക്ക നമ്പര്‍ ആവശ്യപ്പെട്ടു.ഗോവിന്ദ് കാര്‍ഡിലെ നമ്പര്‍ പറഞ്ഞതിനുശേഷം 15 മിനിട്ടിനുള്ളില്‍ നാല് തവണയായാണ് പണം പിന്‍വലിച്ചത്.
പശ്ചിമ ബംഗാളിലെ വീര്‍ഭട്ടിലാണ് ഗോവിന്ദിന്റെ എസ്.ബി.ഐ അക്കൗണ്ട്.ബാങ്കിലെ മാനേജരാണെന്ന് പരിചയപ്പെടുത്തിയാണ് ഫോണ്‍ സന്ദേശമെത്തിയത്. സംഭവത്തില്‍ എസ.്ബി.ഐയുടെ ബംഗാളിലെ ബ്രാഞ്ചില്‍ പരാതി നല്‍കിയെങ്കിലും അധികൃതര്‍ കൈമലര്‍ത്തിയെന്നാണ് ഗോവിന്ദ് പറയുന്നത്. അക്കൗണ്ടില്‍ നിന്നും 124627 രൂപയാണ് നഷ്ടപ്പെട്ടത്. ബാലന്‍സ് 917 രൂപമാത്രമാണ് അക്കൗണ്ടിലുള്ളത്. വൈകുന്നേരം ഗോവിന്ദ് കോള്‍ വന്ന നമ്പരില്‍ തിരികെ വിളിച്ചിരുന്നു. കോള്‍ അറ്റന്‍ഡ് ചെയതവരോട് ബാലന്‍സ് കിടക്കുന്ന തുകയില്‍ 917 രൂപകൂടി എടുത്തോളാന്‍ ഗോവിന്ദ് പറഞ്ഞപ്പോള്‍ ഒരു ദിവസത്തെ ഞങ്ങളുടെ വരുമാനം 1.50 കോടി രൂപയാണെന്നും ഇനി അടുത്ത തവണ ബാക്കി പണം പിന്‍വലിച്ചുകൊള്ളാമെന്നുമായിരുന്നു മറുപടി. കഴിഞ്ഞ രണ്ടു വര്‍ഷമായി തൊടുപുഴയിലെ ഹോട്ടലില്‍ ജോലി ചെയത് സമ്പാദിച്ച പണമാണ് നഷ്ടപെട്ടത്.