അടിമാലി: ദേശീയപാതയിലെ നിര്‍മ്മാണ തര്‍ക്കങ്ങള്‍ക്ക് ശാശ്വത പരിഹാരമാകുന്നു. കൊച്ചി - ധനുഷ്‌കോടി  ദേശീയ പാതയുടെ നേര്യമംഗലം മേഖലയിലെ റോഡ് നിര്‍മ്മാണ പ്രവര്‍ത്തനങ്ങളുടെ പ്രശ്‌നങ്ങള്‍ പരിഹരിക്കുന്നതിന് വനംവകുപ്പ് അഡീഷണല്‍ പ്രിന്‍സിപ്പല്‍ ചീഫ് കണ്‍സര്‍വേറ്റര്‍ പി കെ കേശവനും സംഘവും സ്ഥലം സന്ദര്‍ശിച്ചു.
  വനംവകുപ്പു മന്ത്രിയുടെ നിര്‍ദേശത്തെ തുടര്‍ന്നാണ് അടിയന്തിരമായി ഉദ്യോഗസ്ഥര്‍ സ്ഥലത്തെത്തിയത്. നിര്‍മ്മാണം തടസപ്പെട്ട ആറാം മൈലിലെ കലുങ്ക് ഉള്‍പ്പെടെ നാല് കലുങ്കുകളും ഉടന്‍ പൂര്‍ത്തീകരിക്കുന്നതിന് തടസമില്ലെന്ന് മന്ത്രിക്ക് ഉദ്യോഗസ്ഥര്‍ റിപ്പോര്‍ട്ട് നല്‍കും. നിര്‍മ്മാണ പ്രവര്‍ത്തനങ്ങളുടെ ആരംഭഘട്ടത്തില്‍ വനംവകുപ്പ് അധികൃതര്‍ നിര്‍മ്മാണം തടഞ്ഞതിനെ തുടര്‍ന്ന് എം പിയും എംഎല്‍എമാരും വനംവകുപ്പ് മന്ത്രിയുമായി കൂടിക്കാഴ്ച നടത്തിയിരുന്നു. ഇക്കാര്യങ്ങള്‍ ബോധ്യപെട്ട മന്ത്രി  തിരുവനന്തപുരത്ത് ബന്ധപ്പെട്ട വകുപ്പുകളുടെ യോഗം ചേര്‍ന്ന് നിര്‍മ്മാണം ആരംഭിക്കാന്‍ തീരുമാനമെടുത്തിരുന്നുവെങ്കിലും റോഡിന്റെ വീതി സംബന്ധിച്ചുള്ള തര്‍ക്കം നിര്‍മ്മാണം പ്രവര്‍ത്തനങ്ങള്‍ക്ക് തടസമാകുകയായിരുന്നു. ഇതിനെ തുടര്‍ന്ന് വീണ്ടും മന്ത്രിയുമായി രാഷ്ട്രീയ നേതാക്കള്‍ ചൊവ്വാഴ്ച നടത്തിയ ചര്‍ച്ചയെ തുടര്‍ന്നാണ്  ഉടന്‍ സ്ഥലം സന്ദര്‍ശിച്ച് റിപ്പോര്‍ട്ട് നല്‍കാന്‍ നിര്‍ദേശിച്ചത്.
  ഇപ്പോള്‍ നടക്കുന്ന നിര്‍മ്മാണ പ്രവര്‍ത്തനങ്ങള്‍ ദേശീയപാതക്ക് കീഴിലുള്ള സ്ഥലത്താണെന്ന് ബോധ്യപ്പെട്ടതായി അഡീഷ്ണല്‍ ചീഫ് കണ്‍സര്‍വേറ്റര്‍ പി കെ കേശവന്‍ പറഞ്ഞു. രാവിലെ എത്തിയ ഉന്നത ഉദ്യോഗസ്ഥര്‍ മുടങ്ങി കിടക്കുന്ന ആറാംമൈല്‍ മുതലുള്ള മലയോര ഹൈവേയും സന്ദര്‍ശിച്ച് ദേശീയപാത ഉദ്യോഗസ്ഥരുമായി ചര്‍ച്ച നടത്തി. മൂന്നാര്‍ ഡിഎഫ്ഒ നരേന്ദ്രബാബു, ഫ്‌ളയിംങ് സ്‌ക്വാഡ് ഡിഎഫ്ഒ സിബി വര്‍ഗീസ്, ദേശീയപാത വിഭാഗം അസിസ്റ്റന്റ് എന്‍ജിനീയര്‍ എന്‍ ഐ സൗമ്യ, എന്നിവരും സംഘത്തിലുണ്ടായിരുന്നു.