ബന്തിയോട്: ഒന്നാം ക്ലാസ് വിദ്യാര്‍ഥിയെ മുഖത്തടിച്ചു പരുക്കേല്‍പ്പിച്ച പരാതിയില്‍ സ്വകാര്യ സ്‌കൂള്‍ ബസ് ഡ്രൈവര്‍ അറസ്റ്റില്‍. ബന്തിയോട് മുട്ടം സ്വകാര്യ സ്‌കൂളിലെ ബസ് ഡ്രൈവര്‍ ഷിറിയയിലെ തിരുമലേഷാ(31)ണ് അറസ്റ്റിലായത്. തിങ്കളാഴ്ച സ്‌കൂള്‍ വിട്ടു വീട്ടിലേക്കു തിരിച്ചു വരുമ്പോഴാണ് സംഭവം.
ബസില്‍ കയറി ഇരുന്ന കുട്ടി ഒച്ചവെച്ചതിന് അടങ്ങി ഇരിക്കാന്‍ പറഞ്ഞായിരുന്നു മുഖത്തടിച്ചതെന്നു പിതാവ് മീയപ്പദവ് മീഞ്ച ഹൊസഹിത്തിലു ഹൗസില്‍ ആഷിക് കുമ്പള പൊലിസില്‍ നല്‍കിയ പരാതിയില്‍ പറയുന്നു.
കുട്ടി വീട്ടില്‍ വിവരം പറഞ്ഞതിന്റെ അടിസ്ഥാനത്തില്‍ വീട്ടുകാര്‍ കുട്ടിയെ കാസര്‍കോട് ജനറല്‍ ആശുപത്രിയില്‍ പ്രവേശിപ്പിക്കുകയും ചൈല്‍ഡ് ലൈനിനെ വിവരമറിയിക്കുകയുമായിരുന്നു.