വിഴിഞ്ഞം:   ബൈക്കില്‍ സഞ്ചരിക്കുകയായിരുന്ന കൊലക്കേസ് പ്രതിയായ യുവാവിനെയും പിതാവിനെയും കാറിടിച്ച് കൊലപ്പെടുത്താന്‍ ശ്രമിച്ച സംഭവത്തില്‍ ഒരാളെ പൂവാര്‍ പൊലിസ് അറസ്റ്റ് ചെയ്തു.
പൂവാര്‍ ശൂലം കുടി സ്വദേശി അജിത് (26) ആണ് പിടിയിലായത്. മറ്റ് പ്രതികള്‍ക്കായി അന്വേഷണം ഊര്‍ജിതമാക്കി. ആക്രമണത്തിനായി സംഘം ഉപയോഗിച്ചതെന്ന് കരുതുന്ന കാര്‍  പരശുവയ്ക്കലില്‍ നിന്ന് പൊലിസ് കസ്റ്റഡിയിലെടുത്തു.പൂവാര്‍ സ്വദേശി ഇമാം ബാദുഷ (19) , പിതാവ് ഷാഹുല്‍ ഹമീദ് (50) എന്നിവരെയാണ് കൊലപ്പെടുത്താന്‍ ശ്രമിച്ചത്. മെഡിക്കല്‍ കോളേജില്‍ പ്രവേശിപ്പിച്ച ഇവര്‍  അപകടനില തരണം ചെയ്തതായി പൊലിസ് അറിയിച്ചു.സംഭവ ശേഷം ഒളിവില്‍ പോയ അജിത്തിനെ ഇന്നലെ രാവിലെ പൂവാറില്‍ന്നാണ് അറസ്റ്റ്‌ചെയ്തത്. മറ്റുള്ളവരെ കണ്ടെത്താന്‍ സൈബര്‍ സെല്ലിന്റെ സഹായം തേടിയതായും പൊലിസ്് അറിയിച്ചു.