പെരിന്തല്‍മണ്ണ:  നഗരത്തില്‍ റോഡുകള്‍ തകര്‍ന്ന നിലയില്‍ തന്നെ. നഗരഹൃദയത്തിലെ റോഡുകളാണ് തകര്‍ന്നിരിക്കുന്നത്. മഴ നിലച്ചാല്‍ റോഡുകള്‍ പൂര്‍വസ്ഥിതിയിലാക്കാമെന്നായിരുന്നു അധികൃതരുടെ വാദം. എന്നാല്‍ റോഡുകളിപ്പോഴും തകര്‍ന്നുകിടക്കുകയാണ്. ട്രാഫിക്ക് ജങ്ഷനിലടക്കം പല ഭാഗത്തും പാടെ തകര്‍ന്ന നിലയിലാണ്. അടിയന്തിരമായ നടപടികള്‍ ഈ വിഷയത്തില്‍ അധികൃതര്‍ എടുക്കണമെന്നാണ് നാട്ടുകാരുടെയും വ്യാപാരികളുടെയും ആവശ്യം. മാനത്തുമംഗലം പൊന്നയാകുര്‍ശ്ശി ബൈപ്പാസില്‍ തകര്‍ന്ന റോഡിലൂടെ വാഹനങ്ങള്‍ കടന്ന് പോകുമ്പോള്‍ പൊടി ശല്യം കാരണം യാത്രക്കാര്‍ ഏറെ ദുരിതത്തിലാണ്.  കൂടാതെ ബൈപ്പാസ് റോഡും ഊട്ടി റോഡുമെല്ലാം തകര്‍ച്ചയിലാണ്.