വണ്ടൂര്‍: പാലിയേറ്റീവ് കെയര്‍ പ്രവര്‍ത്തനം കൂടുതല്‍ ജനകീയമാക്കുന്നതിനായി സഹയാത്ര പദ്ധതിയുമായി വണ്ടൂര്‍ പാലിയേറ്റീവ് യൂനിറ്റ്. പഞ്ചായത്തില്‍ പാലിയേറ്റീവ് പരിചരണം ആവശ്യമുള്ള മുഴുവന്‍ രോഗികളേയും കണ്ടെത്തുകയും ഓരോ വീടുകളിലും ഒരു പാലിയേറ്റീവ് വളണ്ടിയറെ സൃഷ്ടിച്ചെടുക്കുകയുമാണ് ആറ് മാസക്കാലത്തെ പദ്ധതി കൊണ്ടുദ്ദേശിക്കുന്നത്. ഇതിന്റെ ഭാഗമായി വാര്‍ഡുകള്‍ തോറും കര്‍മ സമിതിയുടെ നേതൃത്വത്തില്‍ ബോധവല്‍ക്കരണ ക്ലാസുകള്‍ പൂര്‍ത്തീകരിച്ച് കഴിഞ്ഞു. രണ്ടായിരത്തില്‍ പരം പുതിയ വളണ്ടിയര്‍മാര്‍ രോഗീപരിചരണത്തിനു സന്നദ്ധരായി രംഗത്തെത്തിയിട്ടുണ്ട്. ഇവര്‍ക്കുള്ള ആദ്യ ഘട്ട പരിശീലനത്തിന്റെ ഉദ്ഘാടനം നാളെ ഐശ്വര്യ ഓഡിറ്റോറിയത്തില്‍ എ.പി അനില്‍കുമാര്‍ എം.എല്‍.എ ഉദ്ഘാടനം ചെയ്യും. വാര്‍ത്താ സമ്മേളനത്തില്‍ ഭാരവാഹികളായ പി.എ.കെ അനീസ്, എം.സുബൈര്‍, സുനില്‍ ബിന്‍ മുഹമ്മദ്, വിക്ടര്‍ ജോര്‍ജ്, സി.കബീര്‍, കെ.ടി ഫിറോസ് എന്നിവര്‍ പങ്കെടുത്തു.