ഗുവാഹത്തി: പരുക്കേറ്റ ഗോള്‍ കീപ്പര്‍ സുബ്രതോ പാലിനു പകരം വല കാക്കാന്‍ വന്ന വെല്ലിങ്ടന്‍ വരുത്തിയ ഒറ്റ പിഴവ് നോര്‍ത്ത്ഈസ്റ്റിന്റെ കുഴി തോണ്ടി. ഐ.എസ്.എല്ലില്‍ നോര്‍ത്ത്ഈസ്റ്റ് യുനൈറ്റഡിനെ മറുപടിയില്ലാത്ത ഒറ്റ ഗോളിനു പരാജയപ്പെടുത്തി മുംബൈ സിറ്റി എഫ്.സി പോയിന്റ് പട്ടികയില്‍ ഒന്നാമതെത്തി. ജാക്കിചന്ദ് സിങിന്റെ ഗോളാണ് മുംബൈക്ക് വിജയം സമ്മാനിച്ചത്. കളിയുടെ 45ാം മിനുട്ടിലാണ് ജാക്കി ഗോള്‍ നേടിയത്.
സ്വന്തം തട്ടകത്തില്‍ നടന്ന മത്സരത്തിലാണ് വടക്കുകിഴക്കന്‍മാര്‍ തോല്‍വി വഴങ്ങിയത്. 42ാം മിനുട്ടില്‍ പ്രതിരോധ താരം ഗുസ്താവോ നല്‍കിയ ബാക്ക് പാസ് അലക്ഷ്യമായി വെല്ലിങ്ടന്‍ കാലില്‍ കൊരുത്തു. മുന്നോട്ടു കയറി വന്ന മുംബൈ താരം സോണി നോര്‍ദയെ വെട്ടിച്ച് വെല്ലിങ്ടന്‍ പന്ത് മുന്നോട്ട് തട്ടി. എന്നാല്‍ പിന്നില്‍ മാറാതെ നിന്ന സോണി നോര്‍ദെ വീണ്ടും പന്തെടുക്കാന്‍ ശ്രമിച്ചപ്പോള്‍ നോര്‍ത്ത്ഈസ്റ്റ് ഗോളിക്ക് ഇത്തവണ പിഴച്ചു. ബോക്‌സില്‍ നിന്ന ജാക്കി ചന്ദ് നോര്‍ദെ നല്‍കിയ പാസിനെ അനായാസം വലയിലാക്കി. രണ്ടാം പകുതിയില്‍ വടക്കുകിഴക്കന്‍മാര്‍ സമനില പിടിക്കാനുള്ള ശ്രമം നടത്തിയെങ്കിലും മുംബൈ ഗോള്‍ കീപ്പര്‍ ആല്‍ബിനോ ഗോമസിന്റെ മികച്ച പ്രകടനം അവരുടെ കണക്കുകൂട്ടലുകള്‍ തെറ്റിച്ചു.
മത്സരം പലപ്പോഴും കൈയാങ്കളിയിലേക്ക് നീങ്ങിയത് രസംകൊല്ലിയായി. റഫറി മത്സരത്തിലുടനീളം ആറു മഞ്ഞ കാര്‍ഡുകള്‍ കാണിച്ചു. നാലാം വിജയം സ്വന്തമാക്കിയാണ് മുംബൈ 15 പോയിന്റുമായി ഒന്നാം സ്ഥാനത്തെത്തിയത്.