അഹമദാബാദ്: ഗുജറാത്തില്‍ അഹമദാബാദിനു സമീപം ധോല്‍ക്കയില്‍ മിനി വാന്‍ ട്രക്കുമായി കൂട്ടിയിടിച്ച് 14 പേര്‍ മരിച്ചു. മൂന്നു പേര്‍ക്ക് പരുക്കേറ്റു. കഴിഞ്ഞ ദിവസം അര്‍ധരാത്രിയോടെയാണ് അപകടം. മറ്റൊരു വാഹനത്തെ മറികടക്കാന്‍ ശ്രമിക്കുന്നതിനിടെ ട്രക്ക് മിനിവാനില്‍ ഇടിക്കുകയായിരുന്നു. വാനില്‍ 17 പേരാണ് ഉണ്ടായിരുന്നത്.രാജ്‌കോട്ട് സോക്ദയിലെ അഞ്ചു കുടംബങ്ങളില്‍ നിന്നുള്ളവരാണ് അപകടത്തില്‍ പെട്ടത്. ഇവര്‍ തീര്‍ഥാടനകേന്ദ്രം സന്ദര്‍ശിച്ച് മടങ്ങുകയായിരുന്നു.

വിദ്യാര്‍ഥി സ്‌കൂള്‍ ഡയരക്ടറെ വെടിവച്ചു

ഭോപാല്‍: മധ്യപ്രദേശില്‍ ഒമ്പതാം ക്ലാസ് വിദ്യാര്‍ഥി സ്‌കൂള്‍ ഡയരക്ടറെ വെടിവയ്ച്ചു. രത്ത്‌ലം ജില്ലയിലെ ജാവോറയിലാണ് സംഭവം.
മൈല്‍ സ്‌റ്റോണ്‍ അക്കാദമി സ്‌കൂള്‍ ഡയരക്ടര്‍ അമിത് ജയിനാണ് വെടിയേറ്റത്. ഇയാള്‍ ഗുരുതരാവസ്ഥയിലാണ്. വെടിവയ്ച്ചതിന് ശേഷം വിദ്യാര്‍ഥി കടന്നുകളഞ്ഞു. യൂനിഫോം ധരിക്കാതെ സ്‌കൂളിലെത്തിയ വിദ്യാര്‍ഥിയോട് ജയിന്‍ വീട്ടില്‍ പോയി വേഷം മാറി വരാന്‍ നിര്‍ദേശിച്ചു. കുട്ടിയുടെ അശ്രദ്ധയെക്കുറിച്ച് ഇയാള്‍ വീട്ടില്‍ വിളിച്ച് അറിയിക്കുകയും ചെയ്തു. വീട്ടില്‍ പോയ വിദ്യാര്‍ഥി തിരികെ തോക്കുമായി സ്‌കൂളിലെത്തി ജയിന്റെ വയറ്റില്‍ വെടിവയ്ക്കുകയായിരുന്നു