തൊടുപുഴ: താനടക്കമുളള സി.പി.ഐ മന്ത്രിമാരെ മണ്ടനെന്ന് വിളിച്ച സി.പി.എം സംസ്ഥാന സെക്രട്ടറിയേറ്റംഗം എം.എം മണി എം.എല്‍.എക്ക് കവിതയിലൂടെ മറുപടി നല്‍കി കൃഷി മന്ത്രി വി.എസ് സുനില്‍കുമാര്‍. മണിയുടെ പരാമര്‍ശത്തെക്കുറിച്ച് തൊടുപുഴയില്‍ മാധ്യമപ്രവര്‍ത്തകര്‍ ചോദിച്ചപ്പോഴാണ് മന്ത്രി നാലുവരി കവിത ചൊല്ലിയത്.
മണിയാശാന്‍ തന്നെക്കുറിച്ച് യാതൊരു പരാമര്‍ശവും നടത്തിയതായി അറിയില്ലെന്നും മന്ത്രി പറഞ്ഞു.
മണിയാശാന്റെ സ്വഭാവം എല്ലാവര്‍ക്കും അറിയാം. എല്ലാവരും മണിയാശാന് ഇളവ് നല്‍കിയിട്ടുണ്ട്. എം.എം മണിയുമായി യാതൊരു പിണക്കമോ തര്‍ക്കമോ ഇല്ല. അദ്ദേഹം ഒരു ശുദ്ധഗതിക്കാരനാണ്.
എന്തെങ്കിലും തന്നെക്കുറിച്ച് പറഞ്ഞിട്ടുണ്ടെങ്കില്‍ തന്നെ അതിനെ ആ നിലയ്ക്ക് കണ്ടാല്‍ മതിയെന്നും സുനില്‍കുമാര്‍ പറഞ്ഞു.
എന്നാല്‍ മണിയാശാന്‍ കഥയറിയാതെ ആട്ടം കാണുകയാണോ എന്ന ചോദ്യത്തില്‍ നിന്നും മന്ത്രി ഒഴിഞ്ഞുമാറി. അതേസമയം മന്ത്രി സുനില്‍കുമാര്‍ പങ്കെടുത്ത ചടങ്ങില്‍ നിന്ന് ജില്ലയിലെ സി.പി.എം നേതാക്കള്‍ വിട്ടുനിന്നത് ശ്രദ്ധേയമായി. ഇന്നലെ തൊടുപുഴ വെങ്ങല്ലൂര്‍ ഷെറോണ്‍ കള്‍ച്ചറല്‍ സെന്ററില്‍ കൃഷി വകുപ്പും ആത്മയും സംഘടിപ്പിച്ച അഗ്രിടെക് 2016 ലാണ് സംഭവം.