ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിയെ പിന്തള്ളി ലിവര്‍പൂള്‍ പോയിന്റ് പട്ടികയില്‍ ഒന്നാമത്. വാട്‌ഫോര്‍ഡിനെ ഒന്നിനെതിരേ ആറു ഗോളുകള്‍ക്ക് തകര്‍ത്താണ് യുര്‍ഗന്‍ ക്ലോപിന്റെ ടീം തലപ്പത്തെത്തിയത്.
കഴിഞ്ഞ ദിവസം എവര്‍ട്ടനെ 5-0ത്തിനു തകര്‍ത്ത് ചെല്‍സിയും പോയിന്റ് പട്ടികയില്‍ രണ്ടാം സ്ഥാനത്തേക്ക് കയറി. മിഡ്ഡ്ല്‍സ്‌ബ്രോയോടു സമനില വഴങ്ങിയ മാഞ്ചസ്റ്റര്‍ സിറ്റി മൂന്നാം സ്ഥാനത്തേക്കിറങ്ങി.
മറ്റു മത്സരങ്ങളില്‍ ആഴ്‌സണലിനെ ടോട്ടനം 1-1നു സമനിലയില്‍ തളച്ചു. മാഞ്ചസ്റ്റര്‍ യുനൈറ്റഡ് 3-1നു സ്വാന്‍സീ സിറ്റിയെ പരാജയപ്പെടുത്തി. ഹള്‍ സിറ്റി 2-1നു സതാംപ്ടനെ കീഴടക്കി.
സെനഗല്‍ താരം സാദിയോ മാനെ ഇരട്ട ഗോളുകള്‍ നേടിയപ്പോള്‍ വിനാല്‍ഡം, കെയ്ന്‍, കുട്ടീഞ്ഞോ, ഫിര്‍മിനോ എന്നിവരാണ് ലിവര്‍പൂളിനായി വല ചലിപ്പിച്ചത്. ഫോം കണ്ടെത്താന്‍ വിഷമിച്ച സ്ലാട്ടന്‍ ഇബ്രാഹിമോവിച് ഇരട്ട ഗോളുകളുമായി തിളങ്ങിയ പോരാട്ടത്തിലാണ് മാഞ്ചസ്റ്ററിന്റെ വിജയം.
ശേഷിച്ച ഗോള്‍ പോഗ്ബ നേടി. ജയത്തോടെ യുനൈറ്റഡ് ഒരു സ്ഥാനം മെച്ചപ്പെടുത്തി ഏഴാമതെത്തി.
മാഡ്രിഡ്: സ്പാനിഷ് ലാ ലിഗയില്‍ റയല്‍ മാഡ്രിഡ് മറുപടിയില്ലാത്ത മൂന്നു ഗോളുകള്‍ക്ക് ലെഗാനെസിനെ കീഴടക്കി. ഗെരത് ബെയ്ല്‍ ഇരട്ട ഗോളുകളുമായി തിളങ്ങി. മറ്റു മത്സരങ്ങളില്‍ ലാസ്പല്‍മാസ് 1-0ത്തിനു എയ്ബറിനേയും സെല്‍റ്റ വിഗോ 2-1നു വല്‍സിയയേയും പരാജയപ്പെടുത്തി. എസ്പാന്യോള്‍ അത്‌ലറ്റിക്ക് ബില്‍ബാവോ പോരാട്ടം ഗോള്‍രഹിത സമനില.
മിലാന്‍: ഇറ്റാലിയന്‍ സീരി എയില്‍ യുവന്റസ് 2-1നു ചീവോയെ പരാജയപ്പെടുത്തി. എ.സി മിലാന്‍ 2-1നു പാലെര്‍മോയേയും കീഴടക്കി.
മ്യൂണിക്ക്: ജര്‍മന്‍ ബുണ്ടസ് ലീഗയില്‍ അപ്രതീക്ഷിത മുന്നേറ്റം നടത്തുന്ന ലെയ്പ്‌സിഗ് മെയ്ന്‍സിനെ 3-1നു വീഴ്ത്തി. ഒന്നാം സ്ഥാനത്തുള്ള ബയേണ്‍ മ്യൂണിക്കിന്റെ പോയിന്റിനൊപ്പമെത്തി.
ഗോള്‍ ശരാശരിയില്‍ മുന്നിലുള്ള ബയേണ്‍ 24 പോയിന്റുമായി ഒന്നാമതു നില്‍ക്കുന്നു. ഇത്രയും പോയിന്റുമായി ലെയ്പ്‌സിഗ് രണ്ടാം സ്ഥാനത്ത്.