ന്യൂഡല്‍ഹി: കോണ്‍ഗ്രസ് പ്രവര്‍ത്തക സമിതി യോഗം ഡല്‍ഹിയില്‍ തുടങ്ങി. ആരോഗ്യ കാരണങ്ങളെത്തുടര്‍ന്ന് കോണ്‍ഗ്രസ് അധ്യക്ഷ സോണിയാ ഗാന്ധി യോഗത്തില്‍ പങ്കെടുക്കുന്നില്ല. ഈ സാഹചര്യത്തില്‍ ഉപാധ്യക്ഷന്‍ രാഹുല്‍ ഗാന്ധിയുടെ അധ്യക്ഷതയിലാവും യോഗം നടക്കുക. സംഘടനാ തെരഞ്ഞെടുപ്പാണ് യോഗത്തിലെ പ്രധാന അജണ്ട.

കോണ്‍ഗ്രസിന്റെ പുനസംഘടന ഈ വര്‍ഷം ഡിസംബര്‍ 31നകം പൂര്‍ത്തിയാക്കാനായിരുന്നു നേരത്തെ നിശ്ചയിച്ചിരുന്നത്. രാഹുല്‍ ഗാന്ധിയെ കോണ്‍ഗ്രസ് പ്രസിഡന്റാക്കി ഉയര്‍ത്തി സംഘടന പുനസംഘടിപ്പിക്കാനുള്ള ഏകദേശ ധാരണയും രൂപം കൊണ്ടിരുന്നു. എന്നാല്‍ രാഹുലിന്റെ സ്ഥാനാരോഹണം അടുത്ത വര്‍ഷത്തേക്ക് മാറ്റിവെക്കാനും, പുനസംഘടന പൂര്‍ത്തിയാക്കാനുള്ള സമയപരിധി തെരഞ്ഞെടുപ്പ് കമ്മീഷനോട് നീട്ടിവാങ്ങാനുമാണ് പാര്‍ട്ടി ആലോചിക്കുന്നതെന്നാണ് സൂചന.