പൂച്ചാക്കല്‍: മാക്കേക്കടവ് നേരേകടവ് ഫെറിയില്‍ കടത്തു വള്ളത്തിന്റെ സര്‍വീസ് തുടങ്ങി. പാലം നിര്‍മാണത്തോടനുബന്ധിച്ച് ഫെറിയിലെ ജങ്കാര്‍ സര്‍വീസ് നിലച്ചതിനെ തുടര്‍ന്നാണ് ഉദയനാപുരം തൈക്കാട്ടുശേരി ഗ്രാമപഞ്ചായത്തുകളുടെ നേതൃത്വത്തില്‍ കടത്തു വള്ളത്തിന്റെ സര്‍വീസ് തുടങ്ങിയത്.
പഞ്ചായത്ത് നേതൃത്വത്തില്‍ ഒരു വള്ളമാണ് സര്‍വീസ് നടത്തുന്നത്. യന്ത്രവല്‍കൃത വള്ളത്തില്‍ സൗജന്യമാണ് യാത്ര. വാഹനങ്ങള്‍ കയറ്റില്ല. 10 മിനിറ്റ് യാത്രാദൈര്‍ഘ്യമുണ്ടാകും. വള്ളത്തിന്റെ തൊഴിലാളിക്കുള്ള ശമ്പളവും ചെലവും പഞ്ചായത്ത് വഹിക്കുമെന്നും ആദ്യഘട്ടത്തില്‍ മൂന്ന് ആഴ്ച്ചത്തേയ്ക്കാണ് വള്ളം സര്‍വീസ് നടത്തുന്നതെന്നും ഉദയനാപുരം പഞ്ചായത്ത് പ്രസിഡന്റ് സാബു പി. മണലാടി പറഞ്ഞു.
അതിനിടെ ഇരുപഞ്ചായത്തുകളും യോഗം ചേര്‍ന്ന് ബോട്ടോ, ചങ്ങാടമോ സര്‍വീസ് തുടങ്ങുന്നത് സംബന്ധിച്ച് തീരുമാനിക്കും. ബോട്ട് ചങ്ങാട ജെട്ടികള്‍ക്കായി നേരേകടവില്‍ സ്ഥലമുണ്ടെങ്കിലും മാക്കേക്കടവില്‍ സ്ഥലം കണ്ടെത്താനായിട്ടില്ല. ഇതിനാല്‍ മണപ്പുറം ഫെറിയില്‍ നിന്നും നേരേകടവിലേക്കു ചങ്ങാട സര്‍വീസ് പരിഗണിക്കുന്നുണ്ടെന്നും അദ്ദേഹം പറഞ്ഞു.
മാക്കേക്കടവ് നേരേകടവ് ഫെറിയിലെ ജങ്കാര്‍ സര്‍വീസ് ഞായറാഴ്ച്ച നിലച്ചിരുന്നു. മാക്കേക്കവല മുതല്‍ മാക്കേക്കടവു വരെയുള്ള റോഡ് ഭാഗത്ത് പൊതുമരാമത്ത് ഗതാഗതവും നിരോധിച്ചിട്ടുണ്ട്. അതേസമയം മാക്കേക്കടവ് നേരേകടവ് ഫെറിയില്‍ പഞ്ചായത്ത് നേതൃത്വത്തില്‍ കൂടുതല്‍ വള്ളങ്ങളുടെ സര്‍വീസ് വേണമെന്ന് ആവശ്യമുയര്‍ന്നിട്ടുണ്ട്.
വിദ്യാര്‍ഥികള്‍, തൊഴിലാളികള്‍ അടക്കം നൂറുകണക്കിനു പേരാണ് ഇതുവഴി കടന്നു പോകുന്നത്. ഇതിനാല്‍ ഒരു വള്ളം അപര്യാപ്തമാകുമെന്നും യാത്രക്കാര്‍ പറയുന്നു.