തൊടുപുഴ: ഇടുക്കിയില്‍ കൗമാരമേളകള്‍ക്ക് തുടക്കമാകുന്നു. ജില്ലാതല കായിക, ശാസ്ത്രമേളകള്‍ക്കൊപ്പം സംസ്ഥാന സി ബി എസ് ഇ കലോല്‍സവവും ഈ മാസം നടക്കും. മേളകളുടെ നടത്തിപ്പിനുള്ള ഒരുക്കങ്ങള്‍ വിദ്യാഭ്യാസ വകുപ്പിന്റെയും തദ്ദേശ സ്ഥാപനങ്ങളുടെയും നേതൃത്വത്തില്‍ പുരോഗമിക്കുകയാണ്.
15ന് ഇരട്ടയാര്‍ സെന്റ് തോമസ് എച്ച്എസില്‍ നടക്കുന്ന റവന്യു ജില്ലാ ശാസ്ത്രമേളയോടെയാണു മേളകള്‍ക്കു തുടക്കമാകുക. 16 നു ശാസ്ത്രമേള സമാപിക്കും അടുത്ത ദിവസം, 17ന് അടിമാലി വിശ്വദീപ്തി സിഎംഐ പബ്ലിക് സ്‌കൂളില്‍ സംസ്ഥാന സിബിഎസ്ഇ കലോല്‍സവം ആരംഭിക്കും.
21നാണു സമാപനം. തുടര്‍ന്ന് 21, 22 തീയതികളില്‍ കാല്‍വരിമൗണ്ട് എച്ച്എസില്‍ റവന്യു ജില്ലാതല കായികമേളയും നടക്കും. ജില്ലാ സ്‌കൂള്‍ കലോല്‍സവം ജനുവരി ആദ്യവാരം തൊടുപുഴയില്‍ നടത്താനാണ് വിദ്യാഭ്യാസ വകുപ്പ് ഉദ്ദേശിക്കുന്നത്. വേദിയുടെ കാര്യത്തില്‍ അന്തിമ തീരുമാനമായിട്ടില്ല. ഉപജില്ലാതല കായികമേളകള്‍ 20നകം പൂര്‍ത്തിയാക്കാന്‍ നിര്‍ദേശം നല്‍കിയിട്ടുണ്ട്.
ജില്ലാതല കായിക, കലാ, ശാസ്ത്രമേളകളുടെ നടത്തിപ്പിനായി കുറഞ്ഞത് 20 ലക്ഷം രൂപയെങ്കിലും ചെലവ് പ്രതീക്ഷിക്കുന്നു.