ചാവക്കാട്: കനോലി കനാലില്‍ മല്‍സ്യം കൂട്ടത്തോടെ ചത്തു പൊന്തി. വെള്ളത്തിന് ദുര്‍ഗന്ധം. പരിസരവാസികളുടെ ജീവിതം ദുരിതത്തില്‍. ഒരുമനയൂര്‍ വില്യംസ് മുതല്‍ മൂന്നാംകല്ല് വരേയുള്ള കനോലി കനാലിലാണ് മല്‍സ്യങ്ങള്‍ കൂട്ടത്തോടെ ചത്തു പൊന്തിയിട്ടുള്ളത്. ഒരുമനയൂര്‍ അംബേദ്കര്‍ കോളനിക്കടുത്ത് നൂറുകണക്കിന് മീനാണ് ഇന്നലെ രാവിലെ മുതല്‍ ചത്തു പൊന്തിയത്. കഴിഞ്ഞ ദിവസം രാത്രിയിലും മല്‍സ്യങ്ങള്‍ ചത്തു പൊന്തിയിരുന്നു. കരിമീന്‍, പൂവാലന്‍, പോട്ട, വരാല്‍ തുടങ്ങിയ മല്‍സ്യങ്ങളാണ് ചത്തത്. വെള്ളത്തിന് ദുര്‍ഗന്ധം അനുഭവപ്പെട്ടതോടെ ഇരു കരകളിലുമുള്ള നൂറു കണക്കിന് കുടുംബങ്ങളുടെ ജീവിതം ദുസ്സഹമായിട്ടുണ്ട്.