കാസര്‍കോട്: ഈമാസം 14, 15 തിയതികളിലായി ചട്ടഞ്ചാല്‍ ഹയര്‍സെക്കന്‍ഡറി സ്‌കൂളില്‍ നടക്കുന്ന റവന്യു ജില്ലാ ശാസ്‌ത്രോത്സവത്തിന്റെ ഒരുക്കം പൂര്‍ത്തിയായതായി സംഘാടകര്‍ വാര്‍ത്താസമ്മേളനത്തില്‍ അറിയിച്ചു. 14നു രാവിലെ ഒന്‍പതിനു പ്രവൃത്തി പരിചയമേള, ഐ.ടി മേള, സാമൂഹ്യശാസ്ത്ര മേള എന്നിവ നടക്കും. 10നു പി കരുണാകരന്‍ എം.പി ശാസ്‌ത്രോത്സവം ഉദ്ഘാടനം ചെയ്യും. കെ കുഞ്ഞിരാമന്‍ എം.എല്‍.എ അധ്യക്ഷനാവും.
15 നു ശാസ്ത്രഗണിത ശാസ്ത്ര മേള നടക്കും. മേളയുടെ സമാപന സമ്മേളനം എന്‍.എ നെല്ലിക്കുന്ന് എം.എല്‍.എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ അധ്യക്ഷനാവും. ഏഴ് ഉപജില്ലകളില്‍ നിന്നായി മൂവായിരത്തിലധികം വിദ്യാര്‍ഥികളും അഞ്ഞൂറോളം അധ്യാപകരും പങ്കെടുക്കും. മത്സരാര്‍ഥികളുടെ രജിസ്‌ട്രേഷന്‍ നാളെ നടക്കും.
വാര്‍ത്താസമ്മേളനത്തില്‍ വര്‍ക്കിങ് ചെയര്‍മാന്‍ കെ മൊയ്തിന്‍ കുട്ടിഹാജി, എം മോഹനന്‍ നായര്‍, കെ.വി വാസുദേവന്‍, അബ്ദുല്‍ സമീര്‍, പി രതീഷ്‌കുമാര്‍, രതീഷ് പിലിക്കോട് സംബന്ധിച്ചു.