കല്‍പ്പറ്റ: ലോകഫിഷറീസ് ദിനത്തില്‍ പൂക്കോട് തടാക കരയില്‍ ജില്ലാ മത്സ്യ ഉത്പാദന കേന്ദ്രം ഫിഷറീസ് വകുപ്പ് മന്ത്രി മേഴ്‌സിക്കുട്ടിയമ്മ ഉദ്ഘാടനം ചെയ്യും. അക്വാപാര്‍ക്ക്, പട്ടികജാതി വനിതകളുടെ അലങ്കാര മത്സ്യയൂനിറ്റ്, മത്സ്യമേള, മത്സ്യവിത്തുല്‍പ്പാദന കേന്ദ്രത്തിന്റെ ശിലാസ്ഥാപനം എന്നിവയുടെയും തുടക്കം കുറിക്കും. സംഘാടക സമിതി യോഗത്തില്‍ ജില്ലാ പഞ്ചായത്ത് പ്രസിഡന്റ് ടി ഉഷാകുമാരി അധ്യക്ഷയായി. സി.എസ് ബെന്നി, ഡോ.ദിനേശന്‍ ചെറുവാട്ട്, ജോര്‍ജ് ചുളളിയാന, പി.എം.കുമാരന്‍, ജോസ് അമ്പലവയല്‍, കൃഷ്ണന്‍ പുഴമുടി സംസാരിച്ചു. ജില്ലാ പഞ്ചായത്ത് പ്രസിഡന്റ് ടി ഉഷാകുമാരി ചെയര്‍പേഴ്‌സനും ജില്ലാ കലക്ടര്‍ ഡോ. ബി.എസ് തിരുമേനി കണ്‍വീനറുമായ സംഘാടകസമിതി രൂപവത്കരിച്ചു. ഫിനാന്‍സ് കമ്മിറ്റി ചെയര്‍മാനായി ജില്ലാ പഞ്ചായത്ത് വൈസ്പ്രസിഡന്റ് പി.കെ അസ്മത്ത് കണ്‍വീനറായി സന്ദീപ് കെ രാജുവിനെയും പ്രോഗ്രാം കമ്മിറ്റി ചെയര്‍പേഴ്‌സണായി കെ മിനിയെയും, പബ്ലിസിറ്റി കമ്മിറ്റി ചെയര്‍മാനായി പി.കെ അനില്‍കുമാറിനെയും, റിസ്പഷന്‍ കമ്മിറ്റി ചെയര്‍പേഴ്‌സണായി അനിലാ തോമസിനെയും, ഫുഡ്കമ്മിറ്റി ചെയര്‍പേഴ്‌സണായി എ ദേവികയെയും എക്‌സിബിഷന്‍ കമ്മിറ്റി ചെയര്‍മാനായി കെ ശശീന്ദ്രനെയും തെരഞ്ഞെടുത്തു.

ബ്ലോക്ക്തല അവലോകനം നടത്തി

മാനന്തവാടി: സാക്ഷരതാ മിഷന്‍ തുടര്‍വിദ്യാകേന്ദ്രം പ്രേരക്മാരുടെ ബ്ലോക്ക്തല അവലോകന യോഗം മാനന്തവാടി ബ്ലോക്ക് പഞ്ചായത്ത് വൈസ് പ്രസിഡന്റ് കെ.ജെ പൈലി ഉദ്ഘാടനം ചെയ്തു.
ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ തങ്കമ്മ യേശുദാസ് അധ്യക്ഷയായി. ജില്ലാ സാക്ഷരതാ മിഷന്‍ കോഡിനേറ്റര്‍ പി.പി സിറാജ്, അസി. കോഡിനേറ്റര്‍ കെ ബാബു സംസാരിച്ചു.