ചട്ടഞ്ചാല്‍: മണിക്കൂറോളം പൊരിവെയിലത്ത് മത്സരം നടത്തി സ്‌കൂള്‍ അധികൃതരുടെ പീഡനം. ചട്ടഞ്ചാല്‍ ഹയര്‍സെക്കന്‍ഡറി സ്‌കൂളില്‍ നടക്കുന്ന ജില്ലാ ശാസ്‌ത്രോല്‍സവത്തിലാണ് സംഭവം.
 ഹൈസ്‌കൂള്‍, ഹയര്‍സെക്കന്‍ഡറി വിഭാഗത്തിലുള്ള നെറ്റ് മേക്കിങ് മത്സരം നടത്തിയത് പൊരിവെയിലത്ത്. പേരിന് നേരിയ തുണികൊണ്ടുള്ള പന്തലൊരുക്കിയെങ്കിലും മത്സരം നടന്നത് വെയിലത്താണ്. 12 ഓളം വിദ്യാര്‍ഥികളാണ് മത്സരത്തിനുണ്ടായത്. രാവിലെ 10.30ന് ആരംഭിച്ച മത്സരം അവസാനിച്ചത് ഉച്ചയ്ക്ക് രണ്ടുമണിക്ക്.  ചോക്ക് മേക്കിങും നടന്നത് പൊരിവെയിലത്താണെന്ന് രക്ഷിതാക്കള്‍ പറഞ്ഞു. വിയര്‍ത്തുകുളിച്ചാണ് പലരും മത്സരത്തില്‍ പങ്കെടുത്തത്. സംഘാടകരുടെ അനാസ്ഥയാണ് വിദ്യാര്‍ഥികളെ വെയിലത്ത് നിര്‍ത്താന്‍ കാരണമായതെന്ന് എസ്‌കോര്‍ട്ടിങിനു വന്ന അധ്യാപകരും പരാതിപ്പെട്ടു.