നെയ്യാറ്റിന്‍കര: നഗരസഭയിലെ മരുതത്തൂര്‍ പാവൂര്‍ കുളം വൃത്തിയാക്കി കുളത്തില്‍ വെളളം നിറയ്ക്കണമെന്ന് ഗാന്ധിമിത്രമണ്ഡലം മരുതത്തൂര്‍ ഉപസമിതി പ്രവര്‍ത്തക സമ്മേളനം ആവശ്യപ്പെട്ടു.
കുളം വറ്റി വരണ്ട് പുല്ലും ചെളിയുമായി ശോചനീയാവസ്ഥയിലായിട്ട് വര്‍ഷങ്ങളായി. കുളം നവീകരിക്കണമെന്നാവശ്യപ്പെട്ട് നിരവധി തവണ നിവേദനങ്ങള്‍ നല്‍കിയെങ്കിലും നാളിതുവരെ ഒരു നടപടിയും ഉണ്ടായിട്ടില്ല. മരുതത്തൂര്‍ ഏലായിലെ കൃഷിയ്ക്കാവശ്യമായ ജലം ലഭിക്കുന്നത് ഈ കുളത്തില്‍ നിന്നാണ്. വേനല്‍ ചൂട് കടുത്ത് മഴയുടെ ലഭ്യത കുറഞ്ഞതുകാരണം കൃഷികള്‍ പൂര്‍ണമായും നശിച്ചു തുടങ്ങി. ഇതുകാരണം ഭൂമി പാട്ടത്തിനെടുത്ത് കൃഷി ചെയ്യുന്ന കര്‍ഷകര്‍ നിത്യ ദുരിതത്തിലാണ്. അടിയന്തിരമായി കുളത്തിലെ ചെളി കോരി ശോചനീയാവസ്ഥ പരിഹരിക്കണമെന്ന് സമ്മേളനം ആവശ്യപ്പെട്ടു. യൂനിവേഴ്‌സിറ്റി കോളജിലെ ചരിത്ര വിഭാഗം മുന്‍ മേധാവി പ്രൊഫ.സി.ഗോപിനാഥ് സമ്മേളനം ഉദ്ഘാടനം ചെയ്തു. എം.വേണുഗോപാലന്‍ തമ്പി , അഡ്വ.ബി.ജയചന്ദ്രന്‍നായര്‍ , ഇലിപ്പോട്ടുകോണം വിജയന്‍ , മരുതത്തൂര്‍ ബിനു , ഡോ.ജോസ് , ടി.അനില്‍കുമാര്‍ , അനീസ് മുഹമ്മദ് തുടങ്ങിയവര്‍ പങ്കെടുത്തു.