കോട്ടയം: നഗരത്തിലെ കോളജ് വിദ്യാര്‍ഥികള്‍ക്കും, ഇതരസംസ്ഥാന തൊഴിലാളികള്‍ക്കും കഞ്ചാവ് വിറ്റ് വരികയായിരുന്ന മധ്യവയസ്‌കനെ എക്‌സൈസ് പിടികൂടി. കോട്ടയം മാര്‍ക്കറ്റിന് സമീപം ചന്തക്കടവ് പാറേശ്ശേരില്‍ ജോസഫ് ആന്റണി(ജോയിപ്പന്‍-54)നെയാണ് എക്‌സൈസ് കോട്ടയം റെയ്ഞ്ച് സംഘം പിടികൂടിയത്. ഇയാളില്‍ നിന്നും മുന്നൂറുപൊതി കഞ്ചാവും പിടികൂടി. 500 മുതല്‍ 1000 രൂപയ്ക്ക് വരെയാണ് ഇയാള്‍ കഞ്ചാവ് വിറ്റിരുന്നത്.
കൂടാതെ തമിഴ്‌നാട്ടില്‍ നിന്നും കഞ്ചാവ് കൊണ്ടുവരുന്നവരെ പിടികൂടുമ്പോള്‍ ഇവരെ ജാമ്യത്തില്‍ എടുത്തിരുന്നതും ഇയാളായിരുന്നു എന്നും എക്‌സൈസ് അധികൃതര്‍ പറഞ്ഞു. നഗരത്തില്‍ കഞ്ചാവ് എത്തിക്കുന്നതിലെ പ്രധാന കണ്ണിയാണ് ഇയാള്‍. ഇതിനുമുമ്പും സമാനമായ കേസില്‍ ഇയാള്‍ പിടിക്കപ്പെട്ടിടുണ്ട്.
ഇതിന്റെ കേസുകള്‍ നടന്നു വരുന്നതിനിടെയാണ് കഞ്ചാവുമായി വീണ്ടും പിടിയിലാകുന്നത്. ഏറെനാളായി എക്‌സൈസ് സംഘത്തിന്റെ നിരീക്ഷണത്തിലായിരുന്ന പ്രതിയെ ചന്തക്കടവില്‍ നിന്നും കോടിമത എം.ജി റോഡിലേക്ക് കയറുന്ന ഭാഗത്ത് വച്ചായിരുന്നു പിടികൂടിയത്.
എക്‌സൈസ് കോട്ടയം റെയ്ഞ്ച് ഇന്‍സ്‌പെക്ടര്‍ രാകേഷ് ബി ചിറയത്ത്, പ്രിവന്റീവ് ഓഫിസര്‍ ജെയ്‌സണ്‍ ജേക്കബ്, സിവില്‍ എക്‌സൈസ് ഓഫിസര്‍മാരായ ബൈജുമോന്‍, സുരേഷ്, പ്രസീദ്, സേവ്യര്‍ എന്നിവുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.